@3 cha.Ma. aggakulassa 4 Ma.Ma. 13/294/269 raṭṭhapālasutta

@5 Ma. upari. 14/78/58 gaṇakamoggallānasutta. Anagārassa bhāvo anagāriyaṃ. Pabbajitāti upagatā, evaṃ sabbathāpi anagāriyasaṅkhātaṃ pabbajjaṃ bhikkhubhāvañca upagatāti vuttaṃ hoti. Pubbaṅgamoti pūrato gāmī nāyako. Bahukāroti hitakiriyāya bahūpakāro. Bhavantesaṃ gotamo samādapetāti te kulaputte bhavaṃ gotamo adhisīlādīni gāhetā sikkhāpetā. Sā janatāti so janasamūho. Diṭṭhānugatiṃ āpajjīti dassanānugatiṃ paṭipajjati, yandiṭṭhiko bhavaṃ gotamo yaṃkhantiko yaṃruciko, tepi tandiṭṭhikā honti taṃkhantikā taṃrucikāti attho.

Kasmā panāyaṃ evamāhāti, esa kira pubbe aneke kulaputte agāramajjhe vasante devaputte viya pañcahi kāmaguṇehi paricāriyamāne anto ca bahi ca susaṃvihitārakkhe disvā te aparena samayena bhagavato madhurasaddhammadesanaṃ sutvā saddhāya gharā nikkhamma pabbajitvā ghāsacchādanaparamatāya santuṭṭhe āraññakesu senāsanesu kenaci arakkhiyamānepi anusaṅkitaparisaṅkite haṭṭhapahaṭṭhe udaggūdagge addasa, disvā ca imesaṃ kulaputtānaṃ "ayaṃ phāsuvihāro kiṃ nissāya uppanno"ti cintento "samaṇaṃ gotaman"ti bhagavati pasādaṃ alattha. So taṃ pasādaṃ nivedetuṃ bhagavato santikaṃ āgato, tasmā evamāha.