Kāyakammantavārakathā niṭṭhitā

Vacīkammantavārādivaṇṇanā

[36] Esa nayo sabbattha. Ayampana viseso, vacīkammantavāre tāva aparisuddhavacīkammantāti aparisuddhena musāvādādinā vacīkammantena samannāgatā. Te kathaṃ bhayabheravaṃ avhāyanti? te musāvādena parassa atthaṃ bhañjitvā Pisuṇavācāya mittabhedaṃ katvā pharusavācāya paresaṃ parisamajjhe mammāni tuditvā niratthakavācāya parasattānaṃ kammante nāsetvā "mayaṃ ayuttamakarimhā, sace no te jāneyyuṃ, yesaṃ aparajjhimhā, idāni anubandhitvā anayabyasanaṃ pāpuṇeyyun"ti araññaṃ pavisitvā gacchantare vā gumbantare vā nisīdanti. Te "appamattakampi tiṇasaddaṃ vā paṇṇasaddaṃ vā sutvā idānimhā naṭṭhā"ti tasanti vitasanti, āgantvā parehi parivāritā viya bandhā vadhitā viya ca honti. Evantaṃ bhayabheravaṃ attani samāropanaṭṭhena avhayanti pakkosanti.

Manokammantavāre aparisuddhamanokammantāti aparisuddhena abhijjhādinā manokammantena samannāgatā. Te kathaṃ bhayabheravaṃ avhayanti? te paresaṃ rakkhitagopitesu bhaṇḍesu abhijjhāvisamalobhaṃ uppādetvā parassa kujjhitvā parasatte micchādassanaṃ gāhāpetvā mayaṃ ayuttamakarimhā .pe. Attani samāropanaṭṭhena avhayanti pakkosanti.