[49] Tassa mayhanti ko anusandhi? bodhisatto kira imāni soḷasārammaṇāni pariggaṇhanto ca bhayabheravaṃ adisvā bhayabheravannāma evarūpāsu rattīsu evarūpe senāsane ca paññāyati, handa naṃ tatthāpi gavesāmīti bhayabheravagavesanaṃ akāsi, etamatthaṃ bhagavā idāni brāhmaṇassa dassento tassa mayhanti ādimāha.
Tattha yā tāti ubhayametaṃ rattīnaṃyeva uddesavacanaṃ. Abhiññātāti ettha abhīti lakkhaṇatthe upasaggo. Tasmā abhiññātāti candapāripūriyā candaparikkhayenāti evamādīhi lakkhaṇehi ñātāti veditabbā. Abhilakkhitāti ettha upasaggamattameva, tasmā abhilakkhitā lakkhaṇīyā icceva attho, uposathasamādānadhammassavanapūjā- sakkārādikaraṇatthaṃ lakkhetabbā sallakkhetabbā upalakkhetabbāti vuttaṃ hoti.
Cātuddasīti pakkhassa paṭhamadivasato pabhūti catuddasannaṃ pūraṇī ekā ratti. Evaṃ pañcaddasī aṭṭhamī ca. Pakkhassāti sukkapakkhassa kaṇhapakkhassa ca. Etā tisso tisso katvā cha rattiyo, tasmā sabbattha pakkhavacanaṃ yojetabbaṃ "pakkhassa cātuddasī pakkhassa pañcaddasī pakkhassa aṭṭhamī"ti. Atha pañcamī kasmā