yathābhūtassa yathābhūtassāti yena yena iriyāpathena bhūtassa bhavitassa sato vattamānassa samaṅgībhūtassa vā. Meti mama santike. Tathābhūto tathābhūto vāti tena teneva iriyāpathena bhūto bhavito santo vattamāno samaṅgībhūto vāti attho. So kho ahaṃ .pe. Paṭivinemīti bodhisattassa kira caṅkamantassa tasmiṃ migasiṅgakhurasaddādibhede bhayabheravārammaṇe āgate neva mahāsatto tiṭṭhati, na nisīdati na sayati, athakho caṅkamantova parivīmaṃsanto parivicinanto bhayabheravaṃ na passati, migasiṅgakhurasaddādimattameva taṃ hoti, so taṃ ñatvā idaṃ nāmetaṃ, na bhayabhevaranti tato tiṭṭhati vā nisīdati vā sayati vā. Etamatthaṃ dassento "so kho ahan"ti ādimāha. Esa nayo sabbapeyyālesu. Ito parañca iriyāpathapaṭipāṭiyā avatvā āsannapaṭipāṭiyā iriyāpathā vuttāti veditabbā, caṅkamantassa hi bhayabherave āgate na ṭhito na nisinno na nipanno ṭhitassāpi āgate na caṅkamāmīti evaṃ tassa tassa āsannapaṭipāṭiyā vuttāti.

Asammohavihāravaṇṇanā

[50] Evaṃ bhiṃsanakesupi ṭhānesu attano bhayabheravābhāvaṃ dassetvā idāni jhāyīnaṃ sammohaṭṭhānesu attano asammohavihāraṃ dassetuṃ santi kho pana brāhmaṇāti ādimāha.