Ahaṃ kho pana brāhmaṇa .pe. Sañjānāmīti pākaṭo bodhisattassa rattindivaparicchedo. Sattāhavaddalikakālepi candimasuriyesu adissamānesupi jānātiyeva "ettakaṃ pūrebhattakālo gato, ettakaṃ pacchābhattakālo, ettakaṃ paṭhamayāmo, ettakaṃ majjhimayāmoti, tasmā evamāha. Anacchariyaṃ cetaṃ, yaṃ pūritapāramī bodhisatto evaṃ jānāti. Padesaññāṇe ṭhitānaṃ sāvakānaṃpi rattindivaparicchedo pākaṭo hoti.

Kalyāṇimahāvihāre kira godattatthero dvaṅgulakāle bhattaṃ gahetvā dvaṅgulakāle bhuñjati. Suriye adissamānepi pātoyeva senāsanaṃ pavisitvā tāya velāya nikkhamati. Ekadivasaṃ ārāmikā "sve therassa nikkhamanakāle passāmā"ti bhattaṃ sampādetvā kālatthambhamūle nisīdiṃsu. Thero dvaṅgulakāleyeva nikkhamati. Tato pabhūti kira suriye adissamānepi therassa nikkhamanasaññāya eva bheriṃ ākoṭenti.

Dhajāgaravihārepi kālidevatthero antovasse yāmagaṇḍikaṃ paharati, āciṇṇametaṃ therassa. Na ca yāmayantanāḷikaṃ payojeti, aññe bhikkhū payojenti. Atha nikkhante paṭhame yāme there muggaraṃ gahetvā ṭhitamatteyeva ekadveāraṃ paharanteyeva vā yāmayantaṃ patati, evaṃ tīsu yāmesu samaṇadhammaṃ katvā thero pātoyeva gāmaṃ pavisitvā piṇḍapātaṃ ādāya vihāraṃ āgantvā bhojanavelāya pattaṃ gahetvā divāvihāraṭṭhānaṃ gantvā samaṇadhammaṃ karoti. Bhikkhū kālatthambhaṃ disvā therassa āgamanaṭṭhāya pesenti. So bhikkhu theraṃ divā vihāraṭṭhānā nikkhamantameva vā antarā magge vā passati. Evaṃ padesaññāṇe ṭhitānaṃ sāvakānaṃpi rattindivaparicchedo pākaṭo hoti, kimaṅgampana bodhisattānanti.

Yaṃ kho taṃ .pe. Vadeyyāti ettha pana "yaṃ kho taṃ brāhmaṇa asammohadhammo satto loke uppanno .pe. Sukhāya devamanussānan"ti vacanaṃ vadamāno koci sammāvadeyya sammāvadamāno siyā, na vitathavādī assa. Mameva taṃ vacanaṃ vadamāno sammāvadeyya sammāvadamāno siyā, na vitathavādī assāti evaṃ padasambandho veditabbo.