Pubbabhāgapaṭipadādivaṇṇanā

[51] Evaṃ bhagavā buddhaguṇapaṭilābhāvasānaṃ attano asammohavihāraṃ brāhmaṇassa dassetvā idāni yāya paṭipadāya taṃ koṭippattaṃ asammohavihāraṃ adhigato, taṃ pubbabhāgato pabhūti dassetuṃ āraddhaṃ kho pana me brāhmaṇāti ādimāha.

Keci panāhu "imaṃ asammohavihāraṃ sutvā brāhmaṇassa cittamevaṃ uppannaṃ hoti `kāya nu kho paṭipadāya imaṃ patto'ti, tassa cittamaññāya imāyāhaṃ paṭipadāya imaṃ uttamaṃ asammohavihāraṃ pattoti dassento evamāhā"ti.

Tattha āraddhaṃ kho pana me brāhmaṇa viriyaṃ ahosīti brāhmaṇa na mayā ayaṃ uttamo asammohavihāro kusitena muṭṭhassatinā sāraddhakāyena vikkhittacittena vā adhigato, apica kho tadadhigamāya āraddhaṃ kho pana me viriyaṃ