Upāsakavidhikathā

upāsakavidhiṃ kosallatthaṃ panettha ko upāsako, kasmā upāsakoti vuccati, kimassa sīlaṃ, ko ājīvo, kā vipatti, kā sampattīti idaṃ pakiṇṇakaṃ veditabbaṃ.

Tattha ko upāsakoti yo koci tisaraṇaṃ gato gahaṭṭho, vuttañhetaṃ "yato kho mahānāma upāsako buddhaṃ saraṇaṃ gato hoti, dhammaṃ saraṇaṃ gato hoti, saṃghaṃ saraṇaṃ gato hoti. Ettāvatā kho mahānāma upāsako hotī"ti.

Kasmā upāsakoti ratanattayaupāsanato. So hi buddhaṃ upāsatīti upāsako. Dhammaṃ, saṃghaṃ upāsatīti upāsako.