Subhagavaneti ettha subhagattā subhagaṃ, sundarasirikattā sundarakāmattā cāti vuttaṃ hoti. Tassa hi vanassa sirisampattiyā manussā annapānādīni ādāya divasaṃ tattheva chaṇasamajjaussave karontā bhogasukhaṃ anubhonti, sundarasundare cettha kāme patthenti "puttaṃ labhāma dhītaraṃ labhāmā"ti, tesaṃ taṃ tatheva hoti, evaṃ taṃ sundarasirikattā sundarakāmattā ca subhagaṃ. Apica bahujanakantatāyapi subhagaṃ. Vanayatīti vanaṃ, attasampadāya sattānaṃ bhattiṃ karoti, attani sinehaṃ uppādetīti attho. Vanute iti vā vanaṃ, nānāvidhakusumagandhasammodamatta- kokilādivihaṅgavirutehi mandamārutacalitarukkhasākhāviṭapapallavapalāsehi ca "ettha maṃ paribhuñjathā"ti sabbapāṇino yācati viyāti attho. Subhagañca taṃ vanañcāti subhagavanaṃ. Tasmiṃ subhagavane. Vanañca nāma ropimaṃ sayañjātanti duvidhaṃ, tattha veḷuvanajetavanādīni ropimāni. Andhavanamahāvanaañjanavanādīni sayañjātāni. Idaṃpi sayañjātanti veditabbaṃ.

Sālarājamūleti ettha sālarukkhopi sāloti vuccati. Yathāha "seyyathāpi bhikkhave gāmassa vā nigamassa vā avidūre mahantaṃ sālavanaṃ, tañcassa eraṇḍehi sañchannan"ti "antarena yamakasālānan"ti ca. Vanappati jeṭṭhakarukkhopi. Yathāha:-

"taveva deva vijite tavevuyyānabhūmiyā

ujuvaṃsā mahāsālā nīlobhāsā manoramā"ti.