Etesu catūsu āhāresu kavaḷiṅkārāhāro upatthambhento āhārakiccaṃ sādheti. Phasso phusantoyeva. Manosañcetanā āyūhamānāva. Viññāṇaṃ vijānantameva.

Kathaṃ? kavaḷiṅkārāhāro hi upatthambhentoyeva kāyaṭṭhapanena sattānaṃ Ṭhitiyā hoti. Kammajanitopi hi ayaṃ kāyo kavaḷiṅkārāhārena upatthambhito dasapi vassāni vassasataṃpi yāvaāyuparimāṇaṃ tiṭṭhati. Yathākiṃ? yathā mātuyā janitopi dārako dhātiyā thaññādīni pāyetvā posiyamānova ciraṃ tiṭṭhati, yathā cupatthambhena upatthambhitaṃ gehaṃ. Vuttampi cetaṃ:-

"yathā mahārāja gehe patante aññena dārunā upatthambhenti, aññena dārunā upatthambhitaṃ santaṃ evaṃ taṃ gehaṃ na patati, evameva kho mahārāja ayaṃ kāyo āhāraṭṭhitiko, āhāraṃ paṭicca tiṭṭhatī"ti.

Evaṃ kavaḷiṅkāro āhāro upatthambhento āhārakiccaṃ sādheti. Evaṃ sādhentopi ca kavaḷiṅkāro āhāro dvinnaṃ rūpasantatīnaṃ paccayo hoti āhārasamuṭṭhānassa ca upādinnassa ca. Kammajānaṃ anupālako hutvā paccayo hoti. Āhārasamuṭṭhānānaṃ janako hutvā paccayo hoti.