Paṭisandhiviññāṇaṃ ca yasmiṃ yasmiṃ ṭhāne abhinipatati. Tasmiṃ tasmiṃ ṭhāne paṭisandhināmarūpaṃ gahetvāva nibbattati, tasmiñca nibbatte sabbabhayāni nibbattāniyeva honti, taṃmūlakattāti, iminā kāraṇena viññāṇāhāre abhinipātoyeva bhayanti veditabboti.

Evaṃ bhayesu pana imesu āhāresu sammāsambuddho kavaḷiṅkārāhāre nikantipariyādānatthaṃ "seyyathāpi bhikkhave dve jāyapatikā "tiādinā nayena puttamaṃsūpamaṃ desesi. Phassāhāre nikantipariyādānatthaṃ "seyyathāpi bhikkhave gāvī niccammā"tiādinā nayena niccammagāvūpamaṃ desesi. Manosañcetanāhāre nikantipariyādānatthaṃ "seyyathāpi bhikkhave aṅgārakāsū"tiādinā nayena aṅgārakāsūpamaṃ

Desesi. Viññāṇāhāre nikantipariyādānatthaṃ "seyyathāpi bhikkhave coraṃ āgucārin"tiādinā nayena tisattisatāhatū pamaṃ desesi.

Tatrāyaṃ bhūtamatthaṃ katvā saṅkhepato atthayojanā, dve kira jāyapatikā puttaṃ gahetvā parittena pātheyyena yojanasatikaṃ kantāramaggaṃ paṭipajjiṃsu. Tesaṃ paññāsayojanāni gatānaṃ pāṭheyyaṃ niṭṭhāsi. Te khuppipāsāturā viraḷacchāyāyaṃ nisīdiṃsu. Tato puriso bhariyaṃ āha "bhadde ito samantā paññāsayojanāni gāmo vā nigamo vā natthi, tasmā yantaṃ purisena kātabbaṃ bahuṃpi kasigorakkhādikammaṃ, nadāni sakkā taṃ mayā kātuṃ, ehi maṃ māretvā upaḍḍhaṃ maṃsaṃ khāditvā upaḍḍhaṃ pātheyyaṃ katvā puttena saddhiṃ kantāraṃ nittarāhī"ti. Sāpi sāmikamāha "sāmi mayādāni yaṃ taṃ itthiyā kātabbaṃ bahuṃpi suttakantanādikammaṃ, taṃ kātuṃ na sakkā, ehi maṃ māretvā upaḍḍhaṃ maṃsaṃ khāditvā upaḍḍhaṃ pātheyyaṃ katvā puttena saddhiṃ kantāraṃ nittarāhī"ti. Puna so taṃ āha "bhadde mātugāmamaraṇena dvinnaṃ maraṇaṃ paññāyati, na hi mando kumāro mātaraṃ vinā jīvituṃ sakkoti, yadi pana mayaṃ jīvāma, puna dārakaṃ labheyyāma, handadāni puttakaṃ māretvā maṃsaṃ gahetvā kantāraṃ nittarāmā"ti.