Tato mātā puttamāha "tāta pitu santikaṃ gacchāhī"ti. So agamāsi. Athassa pitā "mayā puttakaṃ posissāmīti kasigorakkhādīhi anappakaṃ dukkhamanubhūtaṃ, na sakkomi puttaṃ māretuṃ, tvaṃyeva tava puttakaṃ mārehī"ti vatvā "tāta mātu santikameva gacchāhī"ti āha. So agamāsi. Athassa mātāpi "mayā puttaṃ patthentiyā govattakukkuravattadevatāyācanādīhipi tāva anappakaṃ dukkhamanubhūtaṃ, ko pana vādo kucchiyā pariharantiyā, na sakkomahaṃ puttaṃ māretun"ti vatvā "tāta pitu santikameva gacchā"ti āha. Evaṃ so dvinnamantarā gacchantoyeva mato. Te taṃ disvā paridevitvā pubbe vuttanayena maṃsāni gahetvā khādantā pakkamiṃsu. Tesaṃ so puttamaṃsāhāro navahi kāraṇehi paṭikkūlattā neva davāya hoti na madāya na maṇḍanāya na vibhūsanāya, kevalaṃ kantāranittaraṇatthāyeva hoti.

@3 cha.Ma. jāyampatikā evamuparipi 4 cha.Ma. gantvā

@5 cha.Ma., i. nittharāhi. evamuparipi