Tasmā yo bhikkhu viññāṇāhāraṃ evaṃ tisattisatāhatasadisaṃ passati, so tattha nikantiṃ pariyādiyati, ayaṃ tisattisatāhatūpamāyaṃ atthayojanā.

So evaṃ imesu āhāresu nikantiṃ pariyādiyanto cattāropi āhāre parijānāti, tesu pariññātesu sabbaṃpi pariññātavatthu pariññātameva hoti. Vuttañhetaṃ bhagavatā:-

"kavaḷiṅkāre bhikkhave āhāre pariññāte pañcakāmaguṇiko rāgo pariññāto hoti, pañcakāmaguṇike rāge pariññāte natthi taṃ saññojanaṃ, yena saññojanena sampayutto ariyasāvako puna imaṃ lokaṃ āgaccheyya. Phasse bhikkhave āhāre pariññāte tisso vedanā pariññātā honti, tīsu vedanāsu pariññātāsu ariyasāvakassa natthi kiñci uttariṃ karaṇīyanti vadāmi. Manosañcetanāya bhikkhave āhāre pariññāte tisso taṇhā pariññātā honti. Tīsu taṇhāsu pariññātāsu ariyasāvakassa natthi kiñci uttariṃ karaṇīyanti vadāmi. Viññāṇe bhikkhave āhāre pariññāte nāmarūpaṃ pariññātaṃ hoti. Nāmarūpe pariññāte ariyasāvakassa natthi kiñci uttariṃ karaṇīyanti vadāmī"ti.

Taṇhāsamudayā āhārasamudayoti purimataṇhāsamudayā paṭisandhikānaṃ āhārānaṃ samudayo nibbatti hotīti attho. Kathaṃ? paṭisandhikkhaṇe hi tisantativasena uppannasamatiṃsarūpabbhantare jātā ojā atthi, ayaṃ taṇhāpaccayā nibbatto upādinnakakavaḷiṅkārāhāro. Paṭisandhicittasampayuttā pana phassacetanā sayaṃ ca cittaṃ viññāṇanti ime taṇhāpaccayā nibbattā upādinnakaphassamano- sañcetanāviññāṇāhārāti. Evaṃ tāva purimataṇhāsamudayā paṭisandhikānaṃ āhārānaṃ samudayo veditabbo. Yasmā panīdha upādinnakāpi anupādinnakāpi āhārā missitvā kathitā, tasmā anupādinnakānaṃpi evaṃ taṇhāsamudayā āhārasamudayo veditabbo.