Sakko pana devānamindo attano pañcavidhaṃ pubbanimittaṃ disvā maraṇabhayasantajjito domanassajāto bhagavantaṃ upasaṅkamitvā pañhaṃ pucchi. So pañhavisajjanāvasāne asītisahassāhi devatāhi saddhiṃ sotāpattiphale patiṭṭhāsi. Sāpassa upapatti puna pākatikāva ahosi.

Subrahmāpi devaputto accharāsahassaparivāro saggasampattiṃ anubhoti, tattha pañcasatā accharāyo rukkhato pupphāni ocinantiyova cavitvā niraye upapannā. So "kiṃ imā cirāyantī"ti upadhārento tāsaṃ niraye nibbattabhāvaṃ disvā "kittakaṃ nukho mama āyū"ti upaparikkhanto attanopi āyuparikkhayaṃ viditvāva tattheva niraye nibbattanabhāvaṃ disvā bhīto ativiya domanassajāto hutvā "imaṃ me domanassaṃ satthā vinessati na añño"ti avasesā pañcasatā acchārāyo gahetvā bhagavantaṃ upasaṅkamitvā pañhaṃ pucchi:-

"niccaṃ uttarastamidaṃ cittaṃ niccaṃ ubbiggamidaṃ mano

anuppannesu kicchesu atho uppattitesu ca