Ghanavinibbhogādidassanatthanti vuttaṃ. Ādisaddena cettha ayampi attho veditabbo:- ayañhi ekasmiṃ kāye kāyānupassīyeva, na aññadhammānupassī, kiṃ vuttaṃ hoti, yathā anodakabhūtāyapi marīciyā udakānupassino honti, na evaṃ aniccadukkhānattaasubhabhūteyeva imasmiṃ kāye niccasukhaattasubhabhāvanānupassī, athakho kāyānupassī aniccadukkhānattaasubhakāyasamūhānupassīyevāti vuttaṃ hoti. Athavā yvāyaṃ parato "idha bhikkhave bhikkhu araññagato vā .pe. So satova assasatī"tiādinā nayena assāsapassāsādicuṇṇikajātaaṭṭhikapariyosāno kāyo vutto, yo ca "idhekacco paṭhavīkāyaṃ aniccato anupassati āpokāyaṃ tejokāyaṃ vāyokāyaṃ kesakāyaṃ lomakāyaṃ chavikāyaṃ cammakāyaṃ maṃsakāyaṃ ruhirakāyaṃ nahārukāyaṃ aṭṭhikāyaṃ aṭṭhimiñjakāyan"ti paṭisambhidāyaṃ kāyo vutto, tassa sabbassa imasmiṃyeva kāye anupassanato "kāye kāyānupassī"ti evaṃpi attho daṭṭhabbo.

@hotīti na dissati. 4 khu. paṭi. 31/727/622-3 satipaṭṭhānakathā (syā)

Athavā kāye ahanti vā mamanti vā evaṃ gahetabbassa yassa kassaci ananupassanato, tassa tasseva pana kesalomādikassa nānādhammasamūhassa anupassanato nānākāye kesādidhammasamūhasaṅkhātakāyānupassīti evamattho daṭṭhabbo. Apica "imasmiṃ kāye aniccato anupassati, no niccato"ti ādinā nayena paṭisambhidāyaṃ āgatanayassa sabbasseva aniccalakkhaṇādino ākārasamūhasaṅkhātassa kāyassānupassanatopi "kāye kāyānupassī"ti evaṃpi attho daṭṭhabbo.