bandheyyevaṃ sakaṃ cittaṃ satiyārammaṇe daḷhan"ti.

Evamassa taṃ senāsanaṃ bhāvanānurūpaṃ hoti. Tena vuttaṃ "idamassa satipaṭṭhānabhāvanānurūpasenāsanapariggahaparidīpanan"ti.

Apica yasmā idaṃ kāyānupassanāya muddhabhūtaṃ sabbabuddhapacceka- buddhabuddhasāvakānaṃ visesādhigamadiṭṭhadhammasukhavihārapadaṭṭhānaṃ ānāpānasatikammaṭṭhānaṃ itthīpurisahatthiassādisaddasamākulaṃ gāmantaṃ apariccajitvāna sukaraṃ sampādetuṃ saddakaṇṭakattā jhānassa. Agāmake pana araññe sukaraṃ yogāvacarena idaṃ kammaṭṭhānaṃ pariggahetvā ānāpānacatutthajjhānaṃ nibbattetvā tameva jhānaṃ pādakaṃ katvā saṅkhāre sammasitvā aggaphalaarahattaṃ pāpuṇituṃ. Tasmāssa anurūpaṃ senāsanaṃ dassento bhagavā "araññagato vā"tiādimāha.

Vatthuvijjācariyo viya hi bhagavā. So yathā vatthuvijjācariyo nagarabhūmiṃ passitvā suṭṭhu upaparikkhitvā "ettha nagaraṃ māpethā"ti upadisati, sotthinā