Khajjamānanti udarādīsu nisīditvā udaramaṃsaṃ oṭṭhamaṃsaṃ akkhikuṭādīni luñcitvā khādiyamānaṃ. Samaṃsalohitanti sesāvasesamaṃsalohitayuttaṃ.

Aññenāti aññena disābhāgena. Hatthaṭṭhikanti catusaṭṭhibhedaṃpi hatthaṭṭhikaṃ pāṭiyekkaṃ vippakiṇṇaṃ. Pādaṭṭhikādīsupi eseva nayo. Terovassikānīti atikkantasaṃvaccharāni. Pūtīnīti abbhokāse ṭhitāni vātātapavuṭṭhisamphasse na terovassikāneva pūtīni honti. Antobhūmigatāni pana cirataraṃ tiṭṭhanti. Cuṇṇakajātānīti cuṇṇacuṇṇaṃ hutvā vippakiṇṇāni. Sabbattha so imamevāti vuttanayena khajjamānādīnaṃ vasena yojanā kātabbā.

Iti ajjhattaṃ vāti evaṃ khajjamānādipariggaṇhanena yāva cuṇṇakabhāvā attano vā kāye, parassa vā kāye, kālena vā attano, kālena vā parassa kāye kāyānupassī viharati.

Idha pana ṭhatvā navasīvathikā samodhānetabbā. "ekāhamataṃ vā"tiādinā nayena vuttā sabbāpi ekā, "kākehi vā khajjamānan"tiādikā ekā, "aṭṭhikasaṅkhalikaṃ samaṃsalohitaṃ nahārusambandhan"ti ekā, "nimmaṃsalohitamakkhitaṃ nahārusambandhan"ti ekā, "apagatamaṃsalohitaṃ nahārusambandhan"ti ekā, "aṭṭhikāni apagatasambandhanānī"tiādikā ekā, "aṭṭhikāni setāni saṅkhavaṇṇapaṭibhāgānī"ti ekā, "puñjakitāni terovassikānī"ti ekā, "pūtīni cuṇṇakajātānī"ti ekā.