Uttarimanussadhammādivaṇṇanā

tato uttariṃ pana visesādhigamaṃ paṭisedhento uttarimanussadhammā alamariyañāṇadassanavisesoti āha.

Tattha alamariyaṃ ñātunti alamariyo, ariyabhāvāya samatthoti vuttaṃ hoti. Ñāṇadassanameva ñāṇadassanaviseso. Alamariyo ca so ñāṇadassanaviseso cāti alamariyañāṇadassanaviseso. Ñāṇadassananti dibbacakkhupi vipassanāpi maggopi phalaṃpi paccavekakhaṇañāṇaṃpi sabbaññutañāṇaṃpi vuccati. "appamatto samāno ñāṇadassanaṃ ārādhetī"ti hi ettha dibbacakkhu ñāṇadassanaṃ nāma. "ñāṇadassanāya cittaṃ abhinīharati abhininnāmetī"ti ettha hi vipassanāñāṇaṃ. "abhabbā te ñāṇadassanāya anuttarāya sambodhāyā"ti. Ettha maggo. "ayaṃ maññe *- uttarimanussadhammā alamariyañāṇadassanaviseso adhigato phāsuvihāro"ti ettha phalañāṇaṃ. "ñāṇañca pana me dassanaṃ udapādi, `akuppā me vimutti, ayamantimā jāti, natthidāni