Takkapariyāhatanti iminā ācariyaṃ paṭibāhati. Evaṃ kirassa ahosi:- samaṇena gotamena ācariye upasaṅkamitvā sukhumaṃ dhammantaraṃ gahitaṃ nāma natthi, takkapariyāhataṃ pana takketvā vitakketvā evaṃ bhavissati evaṃ bhavissatīti takkapariyāhataṃ dhammaṃ deseti. Vīmaṃsānucaritanti imināssa lokiyapaññaṃ anujānāta. Samaṇo gotamo paññavā, so taṃ paññāsaṅkhātaṃ indavajirūpamaṃ vīmaṃsaṃ evaṃ vaṭṭissati. Ito cito ca anucarāpetvā vīmaṃsāya anucaritaṃ dhammaṃ deseti. Sayaṃpaṭibhānanti imināssa dhammesu paccakkhabhāvaṃ paṭibāhati. Evaṃ hissa ahosi:- samaṇassa gotamassa sukhumaṃ dhammantaraṃ vipassanā vā maggo vā phalaṃ vā paccavekkhaṇā vā natthi, ayaṃ pana laddhapariso, rājānaṃ cakkavattiṃ viya naṃ cattāro vaṇṇā parivārenti, suphussitaṃ panassa dantāvaraṇaṃ, mudukā jivhā, madhuro saro, anelagaḷā vācā, so yaṃ yaṃ devassa upaṭṭhāti, taṃ taṃ gahetvā sayaṃpaṭibhānaṃ kathaṃ kathento mahājanaṃ rañjeti.

Yassa ca khvāssatthāya dhammo desitoti yassa ca kho atthāya ayaṃ desito. Seyyathīdaṃ? rāgapaṭighātatthāya asubhakammaṭṭhānaṃ, dosapaṭighātatthāya mettābhāvanā, mohapaṭighātatthāya pañca dhammā, vitakkūpacchedāya ānāpānassati.

So niyyāti takkarassa sammādukkhakkhayāyāti so dhammo yo taṃ yathādesitaṃ karoti, tassa takkarassa sammā hetunā nayena kāraṇena vaṭṭadukkhakkhayāya niyyāti gacchati taṃ atthaṃ sādhetīti dīpeti. Idaṃ panetaṃ na attano ajjhāsayena vadati. Buddhānaṃ hi dhammo aniyyānikoti evamevaṃ vadeyya, na pana sakkoti