@tathāgatassa, na aguṇoti 6 cha.Ma. paṭisiddhassa 7 Sī. passa Nāma atthi, cetopariyañāṇaṃ nāma atthi, dasabalañāṇaṃ nāma atthi, catuvesārajjañāṇannāma atthi, aṭṭhasu parisāsu akampanañāṇannāma atthi, catuyoniparicchedakañāṇannāma atthi, pañcagatiparicchedakañāṇaṃ nāma atthi, sabbepi cete uttarimanussadhammāyeva. Evarūpesu uttarimanussadhammesu ekassāpi hi jānanasamatthaṃ dhammanvayamattaṃpi nāma etassa moghapurisassa na bhavissatīti etamatthaṃ dassetuṃ ayampi hi nāma sāriputtātiādinā nayena imaṃ desanaṃ ārabhi. Tattha anvetīti anvayo, jānāti anubujjhatīti attho. Dhammassa anvayo dhammanvayo, taṃ taṃ sabbaññutañāṇādidhammajānanapaññāyetaṃ adhivacanaṃ. "itipi so bhagavā"tiādīhi evarūpaṃpi nāma mayhaṃ sabbaññutañāṇasaṅkhātaṃ uttarimanussadhammaṃ vijjamānameva atthīti jānituṃ tassa moghapurisassa dhammanvayopi na bhavissatīti dasseti. Iddhividhañāṇādīsupi evaṃ yojanā veditabbā.

Dasabalañāṇādivaṇṇanā

[148] Ettha ca kiñcāpi cetopariyañāṇānantaraṃ tisso vijjā vattabbā siyuṃ, yasmā pana tāsu vuttāsu upari dasabalañāṇaṃ nāma paripūrati, tasmā tā avatvā tathāgatassa dasabalañāṇaṃ paripūraṃ katvā dassento dasa kho panimāni sāriputtātiādimāha. Tattha tathāgatabalānīti aññehi asādhāraṇāni tathāgatasseva balāni. Yathā vā pubbabuddhānaṃ balāni puññissariyasampattiyā āgatāni, tathā āgatabalānītipi attho. Tattha duvidhaṃ tathāgatassa balaṃ kāyabalañca ñāṇabalañca. Tesu kāyabalaṃ hatthikulānusārena veditabbaṃ. Vuttaṃ hetaṃ porāṇehi:-

"kāḷāvakañca gaṅgeyyaṃ paṇḍaraṃ tambapiṅgalaṃ