Idāni yehi balehi samannāgato tathāgato āsabhaṇṭhānaṃ paṭijānāti, yāni ādito ca "dasa kho panīmāni sāriputta tathāgatassa tathāgatabalānī"ti nikkhittāni, tāni vitthārato dassetuṃ katamāni dasa, idha sāriputta tathāgato ṭhānañca ṭhānatotiādimāha. Tattha ṭhānañca ṭhānatoti kāraṇañca kāraṇato. Kāraṇañhi yasmā tattha phalaṃ tiṭṭhati tadāyattavuttitāya uppajjati ceva pavattati ca, tasmā ṭhānanti vuccati. Taṃ bhagavā "ye ye dhammā yesaṃ yesaṃ dhammānaṃ hetupaccayā upādāya, taṃ taṃ ṭhānaṃ. Ye ye dhammā yesaṃ yesaṃ dhammānaṃ na hetupaccayā upādāya, taṃ taṃ aṭṭhānan"ti pajānanto ṭhānañca ṭhānato aṭṭhānañca aṭṭhānato yathābhūtaṃ pajānāti. Abhidhamme panetaṃ "tattha katamaṃ tathāgatassa ṭhānañca ṭhānato aṭṭhānañca aṭṭhānato yathābhūtaṃ ñāṇan"tiādinā nayena vitthāritameva. Yampiti yena ñāṇena. Idampi sāriputta tathāgatassāti idaṃpi ṭhānāṭhānañca ñāṇaṃ tathāgatassa balannāma hotīti attho. Evaṃ sabbapadesu yojanā veditabbā.

Kammasamādānānanti samādiyitvā katānaṃ kusalāsusalakammānaṃ, kammameva vā kammasamādānaṃ. Ṭhānaso hetusoti paccayato ceva hetuto ca. Tattha

@3 cha.Ma. aññātakoṇḍañña...evamuparipi 4 cha.Ma. va