Paṭhavīvāravaṇṇanā

evaṃ puthujjanaṃ dassetvā idāni tassa paṭhavīādīsu vatthūsu sabbasakkāyadhammajanikaṃ maññanaṃ dassento paṭhaviṃ paṭhavitotiādimāha.

Tattha lakkhaṇapaṭhavī sasambhārapaṭhavī ārammaṇapaṭhavī sammatipaṭhavīti catubbidhā paṭhavī.

Tāsu "katamā ca āvuso ajjhattikā paṭhavīdhātu? yaṃ ajjhattaṃ paccattaṃ Kakkhaḷaṃ kharigatan"ti ādīsu vuttā lakkhaṇapaṭhavī. "paṭhaviṃ khaṇeyya vā khaṇāpeyya vā"ti ādīsu vuttā sasambhārapaṭhavī. Ye ca kesādayo vīsatikoṭṭhāsā ayolohādayo ca bāhirā, sā hi vaṇṇādīhi sambhārehi saddhiṃ paṭhavīti sasambhārapaṭhavī. "paṭhavīkasiṇameko sañjānātī"ti ādīsu āgatā pana ārammaṇapaṭhavī nimittapaṭhavītipi vuccati. Paṭhavīkasiṇajjhānalābhī devaloke nibbatto āgamanavasena paṭhavīdevatāti nāmaṃ labhati ayaṃ sammatipaṭhavīti veditabbā. Sā sabbāpi idha labbhati.