@3-3 ka. imāhi aṭṭhahi parisāhipi vesārajjañāṇassa

Tattha khattiyaparisāti khattiyānaṃ sannipatitvā nisinnaṭṭhānaṃ, esa nayo sabbattha. Mārakāyikānaṃ pana sannipatitvā nisinnaṭṭhānaṃ māraparisā veditabbā, na mārānaṃ. Sabbāpi cetā parisā uggaṭṭhānadassanavasena gahitā. Manussā hi "ettha rājā nisinno"ti pakativacanaṃpi vattuṃ na sakkonti, kacchehi sedā muccanti. Evaṃ uggā khattiyaparisā. Brāhmaṇā tīsu vedesu kusalā honti, gahapatayo nānāvohāresu ceva akkharacintāya ca. Samaṇā sakavādaparavādesu kusalā honti. Tesaṃ majjhe dhammakathākathanaṃ nāma ativiya bhāro. Amanussāpi uggā honti. Amanussoti hi vuttamattepi manussānaṃ sakalasarīraṃ saṅkampati, tassa rūpaṃ vā disvā saddaṃ vā sutvā sattā visaññinopi honti. Evaṃ amanussaparisā uggā. Tāsupi dhammakathākathanannāma ativiya bhāro. Iti uggaṭṭhānadassanavasenetā gahitāti veditabbā.

Ajjhogāhatīti anupavisati. Anekasataṃ khattiyaparisanti bimbisārasamāgamañāti- samāgamalicchavisamāgamasadisaṃ. Aññesupi cakkavāḷesu labbhatiyeva. Kiṃ pana bhagavā aññāni cakkavāḷānipi gacchatīti, āma gacchati. Kīdiso hutvā? yādisā te, tādisoyeva. Tenevāha "abhijānāmi kho panāhaṃ ānanda anekasataṃ khattiyaparisaṃ upasaṅkamitvā tattha yādisako tesaṃ vaṇṇo hoti, tādisako mayhaṃ vaṇṇo hoti. Yādisako tesaṃ saro hoti, tādisako mayhaṃ saro hoti. Dhammiyā ca kathāya sandassemi samādapemi samuttejemi sampahaṃsemi. Bhāsamānañca maṃ na jānanti `ko nu kho ayaṃ bhāsati devo vā manusso vā'ti. Dhammiyā ca kathāya sandassetvā samādapetvā samuttejetvā sampahaṃsetvā antaradhāyāmi. Antarahitañca maṃ na jānanti `ko nu kho ayaṃ antarahito devo vā manusso vā"ti.

Khattiyā keyūraṅgamālāgandhādivibhūsitā nānāvirāgavasanā āmuttamaṇikuṇḍalā molīdharā honti. Kiṃ bhagavāpi evaṃ attānaṃ maṇḍeti. Tepi odātāpi honti kāḷāpi maṅguracchavīpi. Kiṃ satthāpi evarūpo