Nirayotiādīsu niratiaṭṭhena nirassādaṭṭhena nirayo. Tiriyaṃ añchantīti tiracchānā. Tesaṃ yoni tiracchānayoni. Peccabhāvaṃ pattānaṃ visayoti pettivisayo. Manaso ussannattā manussā. Pañcahi kāmaguṇehi attano attano ānubhāvehi ca dibbantīti devā. Nirayañcāhaṃ sāriputtātiādīsu nirayoti saddhiṃ okāsena khandhā. Tiracchānayoniṃ cātiādīsupi eseva nayo. Maggaṃ paṭipadanti ubhayenāpi vuttaṃ gatisaṃvattanikakammameva dasseti. Yathā ca paṭipannoti yena maggena yāya paṭipadāya paṭipannoti ubhayaṃpi ekato katvā niddisati. Apāyantiādīsu vuḍḍhisaṅkhātā sukhasaṅkhātā vā ayā apetattā apāyo. Dukkhassa gati paṭissaraṇanti duggati. Dukkaṭakārino ettha vinipatantīti vinipāto. Nibbānañcāhanti idaṃ pana na kevalaṃ gatigatimeva, gatinissaraṇaṃ nibbānaṃpi jānāmīti dassanatthaṃ āha. Idha maggoti paṭipadāti ubhayenapi ariyamaggova vutto.

Ñāṇappavattākāravaṇṇanā

[154] Idāni yathāvuttesu ṭhānesu attano ñāṇappavattākāraṃ dassento idhāhaṃ sāriputtātiādimāha.

Tattha ekantadukkhāti niccadukkhā nirantaradukkhā. Tippāti bahalā. Kaṭukāti khaRā. Seyyathāpītiādīni opammadassanatthaṃ vuttāni. Tattha kāsūti āvāṭopi vuccati rāsīpi.