Evameva khoti ettha idaṃ opammasaṃsandanaṃ:- aṅgārakāsu viya hi nirayo daṭṭhabbo. Aṅgārakāsumaggo viya nirayūpagaṃ kammaṃ. Maggāruḷho viya kammasamaṅgīpuggalo. Cakkhumā puriso viya dibbacakkhuko bhagavā. Yathā so puriso maggārūḷhaṃ disvāva jānāti "ayaṃ iminā maggena gantvā aṅgārakāsuyaṃ patissatī"ti, evameva bhagavā pāṇātipātādīsu yaṅkiñci kammaṃ āyūhantaṃ evaṃ jānāti "ayaṃ imaṃ kammaṃ katvā niraye nibbattissatī"ti. Yathā so puriso aparabhāge taṃ aṅgārakāsuyā patitaṃ passati, evameva bhagavā aparabhāge "so puriso taṃ kammaṃ katvā kuhiṃ nibbatto"ti ālokaṃ vaḍḍhetvā dibbacakkhunā olokento niraye nibbattaṃ passati pañcavidhabandhanādimahādukkhaṃ anubhavantaṃ. Tattha kiñcāpi tassa kammāyūhanakāle añño vaṇṇo, niraye nibbattassa aññoti 4-, athāpi "so satto taṃ kammaṃ katvā tattha nibbatto"ti olokentassa anekasahassānaṃ sattānaṃ majjhe ṭhitopi "ayaṃ so"ti soyeva satto āpāthaṃ āgacchatīti "dibbacakkhubalaṃ nāma etan"ti vadanti.

Dutiyaupamāyaṃ yasmā aṅgārakāsuyaṃ viya gūthakūpe pariḷāho natthi, tasmā "ekantadukkhā"ti avatvā "dukkhā"tiādimāha. Etthapi purimanayeneva opammasaṃsandanaṃ veditabbaṃ. Imaṃpi hi puggalaṃ bhagavā hatthiyoniādīsu yattha katthaci nibbattaṃ vadhabandhanaākaḍḍhanavikaḍḍhanādīhi mahādukkhaṃ anubhavamānaṃ passatiyeva.

@4 cha.Ma. iti-saddo na dissati 5 cha.Ma. iti-saddo na dissati