Tatiyaupamāyaṃ tanupattapalāsoti na abbhapaṭalaṃ viya tanupaṇṇo, viraḷapaṇṇataṃ pana sandhāya idaṃ vuttaṃ. Kabaracchāyoti viraḷacchāyo. Dukkhabahulanti pittivisayasmiṃ hi dukkhameva bahulaṃ, sukhaṃ parittaṃ, kadāci anubhavitabbaṃ hoti, tasmā evamāha. Idhāpi purimanayeneva opammasaṃsandanaṃ veditabbaṃ.

Catutthaupamāyaṃ bahalapattapalāsoti nirantarapaṇṇo pattasañchanno. Saṇḍacchāyoti pāsāṇacchattaṃ viya ghanacchāyo. Sukhabahulā vedanāti manussaloke khattiyakulādīsu sukhabahulā vedanā veditabbā hoti, tā vediyamānaṃ nipannaṃ vā nisinnaṃ vā passāmīti dasseti. Idaṃpi opammasaṃsandanaṃ purimanayeneva veditabbaṃ.

Pañcamaupamāyaṃ pāsādoti dīghapāsādo. Ullittāvalittanti anto ceva ullitaṃ bahi ca avalittaṃ. Phusitaggaḷanti dvārabāhāhi saddhiṃ supihitakavāṭaṃ. Gonakatthatoti caturaṅgulādhikalomena kāḷakojavena atthato. Paṭikatthatoti uṇṇāmayena setaattharaṇena atthato. Paṭalikatthatoti ghanapubbakena uṇṇāmayaattharaṇena atthato. Kaddalimigapavarapaccattharaṇoti kadalimigacammamayena uttamapaccattharaṇena atthato. Taṃ kira paccattharaṇaṃ setavatthassa upari kadalimigacammaṃ attharitvā sibbetvā karonti. Sauttaracchadoti saha uttaracchadena, uparibandhena rattavitānena saddhinti attho. Ubhato lohitakūpadhānoti sīsūpadhānañca pādūpadhānañcāti pallaṅkassa ubhato ṭhapitalohitakūpadhāno. Idhāpi upamāsaṃsandanaṃ purimanayena vibhajitabbaṃ.

Ayampanettha aparabhāgayojanā, yathā so puriso maggāruḷhameva jānāti "ayaṃ etena maggena gantvā pāsādaṃ abhiruyha kūṭāgāraṃ pavisitvā pallaṅke nisīdissati vā nipajjissati vā"ti, evameva bhagavā dānādīsu puññakiriyāvatthūsu yaṅkiñci kusalakammaṃ āyūhantaṃyeva puggalaṃ disvā "ayaṃ imaṃ katvā devaloke nibbattissatī"ti jānāti. Yathā so puriso aparabhāge taṃ pāsādaṃ āruyha kūṭāgāraṃ pavisitvā pallaṅke nisinnaṃ vā nipannaṃ vā ekantasukhaṃ nirantarasukhaṃ vediyamānaṃ passati, evameva bhagavā aparabhāge "so puriso taṃ kalyāṇakammaṃ