@5 cha.Ma. idhāpi 6 cha.Ma. uttaribaddhena 7 cha.Ma. veditabbaṃ 8 cha.Ma. āruyha Katvā kuhiṃ nibbatto"ti ālokaṃ vaḍḍhetvā dibbacakkhunā olokento devaloke nibbattaṃ passati nandanavanādīsu accharāsaṅghaparivutaṃ dibbasampattiṃ anubhavamānaṃ.

Āsavakkhayavāravaṇṇanā

āsavakkhayavāre "dibbena cakkhunā"ti avatvā "tamenaṃ passāmī"ti vuttaṃ. Taṃ kasmāti ce? niyamābhāvā. Imaṃ hi puggalaṃ dibbacakkhunāpi passissati, Cetopariyañāṇenāpi jānissati, sabbaññutañāṇenāpi jānissatiyeva. Ekantasukhā vedanāti idaṃ kiñcāpi devalokasukhena saddhiṃ byañjanato ekaṃ, atthato pana nānā hoti. Devalokasukhaṃ hi rāgapariḷāhādīnaṃ atthitāya na ekanteneva ekantasukhaṃ. Nibbānasukhaṃ pana sabbapariḷāhānaṃ vūpasamāya sabbākārena ekantasukhaṃ. Upamāyaṃpi "yathā pāsāde ekantasukhā"ti vuttaṃ. Taṃ maggapariḷāhassa avūpasantatāya chātajjhattatāya pipāsābhibhūtāya ca ekantameva sukhaṃ. Vanasaṇḍe pana pokkharaṇiyaṃ oruyha rajojallassa pavāhitattā maggadarathassa vūpasantatāya bhisamuḷālakhādanena ceva madhurodakapānena ca khuppipāsānaṃ vinītatāya udakasāṭakaṃ parivattetvā maṭṭhadukūlaṃ nivāsetvā taṇḍulatthavikaṃ ussīsake katvā udakasāṭakaṃ pīḷetvā hadaye ṭhapetvā mandamandena ca vātena vījayamānassa nipannattā sabbākārena ekantasukhaṃ hoti.