Evameva khoti ettha idaṃ opammasaṃsandanaṃ:- pokkharaṇī viya hi ariyamaggo daṭṭhabbo. Pokkharaṇīmaggo viya pubbabhāgapaṭipadā. Maggāruḷho viya paṭipadāsamaṅgīpuggalo. Cakkhumā puriso viya dibbacakkhu bhagavā. Vanasaṇḍo viya nibbānaṃ. Yathā so puriso maggāruḷhaṃ disvāva jānāti "ayaṃ iminā maggena gantvā pokkharaṇiyaṃ nhātvā ramaṇīye vanasaṇḍe rukkhamūle nisīdissati vā nipajjissati vā"ti, evameva bhagavā paṭipadaṃ pūrentameva nāmarūpaṃ paricchindantameva paccayapariggahaṃ karontameva lakkhaṇārammaṇāya vipassanāya kammaṃ karontameva

Yathā so puriso aparabhāge tāyaṃ pokkharaṇiyaṃ nhātvā vanasaṇḍaṃ pavisitvā nisinnaṃ vā nipannaṃ vā ekantasukhaṃ vedanaṃ vedayamānaṃ passati, evameva bhagavā aparabhāge taṃ puggalaṃ paṭipadaṃ pūretvā maggaṃ bhāvetvā phalaṃ sacchikatvā nirodhasayanavaragataṃ nibbānārammaṇaṃ phalasamāpattiṃ appetvā ekantasukhaṃ vedanaṃ vedayamānaṃ passati.

Dukkarakārikādisuddhivaṇṇanā

[155] "abhijānāmi kho panāhaṃ sāriputta caturaṅgasamannāgatan"ti idaṃ kasmā āraddhaṃ? pāṭiyekkaṃ anusandhivasena āraddhaṃ. Ayaṃ kira sunakkhatto dukkarakārikāya suddhi hotīti evaṃladdhiko. Athassa bhagavā mayā etasmiṃ attabhāve ṭhatvā caturaṅgasamannāgataṃ dukkaraṃ kataṃ, dukkarakārako nāma mayā sadiso natthi. Dukkarakārena suddhiyā sati ahameva suddho bhaveyyanti dassetuṃ imaṃ desanaṃ ārabhi. Apica ayaṃ sunakkhatto dukkarakārikāya pasanno, sopassa pasannabhāvo "addasā kho bhagavā sunakkhatto licchaviputto acelaṃ korakkhattiyaṃ catukuṇḍikaṃ chamānikiṇṇaṃ bhakkhasaṃ mukheneva khādantaṃ mukheneva bhuñjantaṃ, disvānassa etadahosi `sādhurūpo vata bho ayaṃ samaṇo catukuṇḍiko chamānikiṇṇaṃ bhakkhasaṃ mukheneva khādati, mukheneva bhuñjatī"tievamādinā pāṭikasutte āgatanayena veditabbo.