Tattha acelakoti niccelo naggo. Muttācāroti visaṭṭhācāro, uccārakammādīsu lokiyakulaputtācārena virahito, ṭhitakova uccāraṃ karomi, passāvaṃ karomi, khādāmi bhuñjāmi ca. Hatthāvalekhanoti hatthe piṇḍamhi niṭṭhite jivhāya hatthaṃ avalikhāmi, uccāraṃ vā katvā hatthasmiṃyeva daṇḍakasaññī hutvā hatthena avalikhāmīti dasseti. Te kira daṇḍakaṃ sattoti paññapenti, tasmā tesaṃ paṭipadaṃ pūrento evamakāsi. Bhikkhāgahaṇatthaṃ ehi bhanteti vutto na etīti na ehibhaddantiko. Tenahi tiṭṭha tiṭṭha bhanteti vuttopi na tiṭṭhatīti na tiṭṭhabhaddantiko. Tadubhayaṃpi titthiyā ca etassa vacanaṃ kataṃ bhavissatīti na karonti. Ahaṃpi evaṃ akāsinti dasseti. Abhihatanti puretaraṃ gahetvā āhaṭabhikkhaṃ. Uddissa katanti imaṃ tumhe uddissa katanti evaṃ ārocitabhikkhaṃ. Na nimantananta asukannāma kulaṃ vā vīthiṃ vā gāmaṃ vā paviseyyāthāti evaṃ nimantitabhikkhaṃpi na sādiyāmi na gaṇhāmi.

Na kumbhimukhāti kumbhito uddharitvā diyyamānaṃ bhikkhaṃ na gaṇhāmi. Na kaḷopimukhāti kaḷopīti ukkhali vā pacchi vā, tatopi na gaṇhāmi. Kasmā? kumbhikaḷopiyo maṃ nissāya kaṭacchunā pahāraṃ labhantīti. Na eḷakamantaranti ummāraṃ antaraṃ katvā diyyamānaṃ na gaṇhāmi. Kasmā? ayaṃ maṃ nissāya antarakaraṇaṃ labhatīti. Daṇḍamusalesupi eseva nayo. Na dvinnanti dvīsu bhuñjamānesu ekasmiṃ uṭṭhāya dente na gaṇhāmi. Kasmā? kabaḷantarāyo hotīti. Na gabbhiniyātiādīsu pana gabbhiniyā kucchiyaṃ dārako kilamati, pāyantiyā dārakassa khīrantarāyo

@4 cha.Ma. bhaddanteti 5 cha.Ma. evaṃ Hoti, purisantaragatāyāti ratiantarāyo hotīti na gaṇhāmi. Na saṅkittīsūti saṅkittetvā katabhattesu. Dubbhikkhasamaye kira acelakasāvakā acelakānaṃ atthāya tato tato taṇḍulādīhi samādapetvā bhattaṃ pacanti. Ukkaṭṭhācelako. Gato na paṭigaṇhāti,