Tattha dhammadesanāti tantiṭhapanā. Dhammapadabyañjananti pāliyā padabyañjanaṃ, tassa tassa atthassa byañjanakaṃ akkharaṃ. Pañhapaṭibhānanti pañhābyākaraṇaṃ. Iminā kiṃ dasseti? tathāgato pubbe daharakāle akkharāni sampiṇḍetvā padaṃ Vattuṃ sakkoti, padāni sampiṇḍetvā gāthaṃ vattuṃ sakkoti, catuakkharehi vā aṭṭhaakkharehi vā soḷasaakkharehi vā padehi yuttāya gāthāya atthaṃ vattuṃ sakkoti. Idāni pana mahallakakāle akkharāni sampiṇḍetvā padaṃ vā, padāni sampiṇḍetvā gāthaṃ vā, gāthāya atthaṃ vā vattuṃ na sakkotīti evaṃ natthi. Daharakāle ca mahallakakāle ca sabbametaṃ tathāgatassa apariyādinnamevāti idaṃ dasseti. Mañcakena cepi manti idaṃ buddhabaladīpanatthameva parikappetvā āha. Dasabalaṃ pana mañcakaṃ āropetvā gāmanigamarājadhāniyo pariharaṇakālo nāma natthi. Tathāgatā hi pañcame āyukoṭṭhāse khaṇḍiccādīhi anabhibhūtā suvaṇṇavaṇṇassa sarīrassa vevaṇṇiye anuppatte devamanussānaṃ piyamanāpakāleyeva parinibbāyanti.

[162] Nāgasamāloti tassa therassa nāmaṃ. Paṭhamabodhiyaṃ hi vīsativassabbhantare upavānanāgitameghiyattherā viya ayaṃpi bhagavato upaṭṭhāko ahosi. Vījayamānoti mandamandena tālavaṇṭavātena bhagavato utusukhaṃ samuṭṭhāpayamāno. Etadavocāti sakalasuttantaṃ sutvā bhagavato pubbacaritaṃ dukkarakāraṃ āgamma pasanno etaṃ "acchariyaṃ bhante"tiādivacanaṃ avoca. Tattha accharaṃ paharituṃ yuttanti acchariyaṃ. Abhūtapubbaṃ bhūtanti abhūtaṃ. Ubhayenapi attano vimhayameva dīpeti. Ko nāmo

@3 cha.Ma. mañcake 4 cha.Ma. ananuppatte Ayaṃ bhanteti idaṃ bhaddako vatāyaṃ dhammapariyāyo, handassa bhagavantaṃ āyācitvā nāmaṃ gaṇhāpemīti adhippāyena āha. Athassa bhagavā nāmaṃ gaṇhanto tasmā tiha tvantiādimāha. Tassattho, yasmā idaṃ suttaṃ sutvā tava lomāni haṭṭhāni, tasmātiha tvaṃ nāgasamāla imaṃ dhammapariyāyaṃ "lomahaṃsanapariyāyo"tveva naṃ dhārehīti.