Paṭhaviyā maññatīti ettha paṭhaviyāti bhummavacanametaṃ. Tasmā ahaṃ paṭhaviyāti maññati, mayhaṃ kiñcanaṃ palibodho vā paṭhaviyāti maññati, paro paṭhaviyāti maññati, parassa kiñcanaṃ palibodho vā paṭhaviyāti maññatīti ayamettha attho.

Athavā yvāyaṃ "kathaṃ rūpasmiṃ attānaṃ samanupassati, idhekacco vedanaṃ saññaṃ saṅkhāre viññāṇaṃ attato samanupassati, tassa evaṃ hoti, ayaṃ kho me attā, so kho pana me ayaṃ attā imasmiṃ rūpeti evaṃ rūpasmiṃ vā attānaṃ samanupassatī"ti etassa atthanayo vutto, eteneva nayena vedanādidhamme attato gahetvā tato ajjhattikabāhirāsu paṭhavīsu yaṅkiñci paṭhaviṃ tassokāsabhāvena parikappetvā so kho pana me ayaṃ attā imissā paṭhaviyāti maññanto paṭhaviyā maññati, ayamassa diṭṭhimaññanā. Tasmiṃyeva panassa attasinehaṃ tabbatthukañca mānaṃ uppādayato taṇhā mānamaññanā veditabbā. Yadā pana teneva nayena so kho panassa attā paṭhaviyāti maññati, tadā diṭṭhimaññanā eva yujjati. Itarāyopi pana icchanti.

Paṭhavito maññatīti ettha pana paṭhavitoti nissakkavacanaṃ. Tasmā saupakaraṇassa attano vā parassa vā yathāvuttappabhedato paṭhavito uppattiṃ vā nigamanaṃ vā paṭhavito vā añño attāti maññamāno paṭhavito maññatīti veditabbo, ayamassa diṭṭhimaññanā. Tasmiṃyeva panassa diṭṭhimaññanāya maññite vatthusmiṃ sinehaṃ mānañca uppādayato taṇhāmānamaññanāpi veditabbā. Apare āhu "paṭhavīkasiṇaṃ parittaṃ bhāvetvā tato ca aññaṃ appamāṇaṃ attānaṃ gahetvā paṭhavito bahiddhāpi me attāti maññamāno paṭhavito maññatī"ti.