Pāpikānaṃ icchānanti lāmakānaṃ asantasambhāvanapatthanānaṃ. Paṭippharatīti paṭiviruddho, paccanīko hutvā tiṭṭhati, apasādetīti kiṃ nukho tuyhaṃ bālassa abyattassa bhaṇitena, tvaṃpi nāma bhaṇitabbaṃ maññissasīti evaṃ ghaṭeti. Paccāropetīti tvaṃpi khosi itthannāmaṃ āpattiṃ āpanno, taṃ tāva paṭikarohīti evaṃ paṭiāropeti.

Aññenaññaṃ paṭicaratīti aññena kāraṇena vacanena vā aññaṃ kāraṇaṃ vacanaṃ vā paṭicchādeti, "āpattiṃ āpannosī"ti vutte "ko āpanno, kiṃ

@4 cha.Ma. ayaṃ pāṭho na dissati 5 cha.Ma. ghaṭṭeti Āpanno, kismiṃ āpanno, kaṃ bhaṇatha, kiṃ bhaṇathā"ti vā vadati, "evarūpaṃ kiñci tayā diṭṭhan"ti vutte "na suṇāmī"ti sotaṃ vā upaneti. Bahiddhā kathaṃ apanāmetīti "itthannāmaṃ āpattiṃ āpannosī"ti puṭṭho "pāṭaliputtaṃ gatomhī"ti vatvā puna "na tava pāṭaliputtagamanaṃ pucchāma, āpattiṃ pucchāmā"ti vutte "tato rājagehaṃ gatomhī"ti, rājagehaṃ vā yāhi brāhmaṇagehaṃ vā, āpattiṃ āpannosīti. Tattha me sūkaramaṃsaṃ laddhantiādīni vadanto kathaṃ bahiddhā vikkhipati.