Apadāneti attano cariyāyaṃ. Na sampāyatīti āvuso tvaṃ kuhiṃ vasasi, kaṃ nissāya vasasīti vā, yaṃ tvaṃ vadesi "mayā esa āpattiṃ āpanno diṭṭho"ti. Tvaṃ tasmiṃ samaye kiṃ karosi, ahaṃ kiṃ karomi, kattha vā tvaṃ acchasi, kattha vā ahanti ādinā nayena cariyaṃ puṭṭho sampādetvā kathetuṃ na sakkoti.

[183] Tatrāvusoti āvuso tesu soḷasasu dhammesu. Attanāva attānaṃ evaṃ anumānitabbanti evaṃ attanāva attā anumetabbo tuletabbo tīretabbo.

[184] Paccavekkhitabbanti paccavekkhitabbo. Ahorattānusikkhināti divāpi rattimpi sikkhantena, rattiñca divā ca kusalesu dhammesu sikkhantena pītipāmojjameva uppādetabbanti attho.

Acche vā udakapatteti pasanne vā udakabhājane. Mukhanimittanti mukhapaṭibimbaṃ. Rajanti āgantukarajaṃ. Aṅgaṇanti tattha jātakaṃ tilakaṃ vā piḷakaṃ vā. Sabbepime pāpake akusale dhamme pahīneti iminā sabbaṃ pahānaṃ kathesi. Kathaṃ? ettakā akusalā dhammā pabbajitassa nānucchavikāti paṭisaṅkhānaṃ uppādayato Hi paṭisaṅkhānappahānaṃ kathitaṃ hotīti. Sīlaṃ padaṭṭhānaṃ katvā kasiṇaparikammaṃ ārabhitvā aṭṭhasamāpattiyo nibbattentassa vikkhambhanappahānaṃ kathitaṃ. Samāpattiṃ padaṭṭhānaṃ katvā vipassanaṃ vaḍḍhentassa tadaṅgappahānaṃ kathitaṃ. Vipassanaṃ vaḍḍhetvā