"garusaṃvāso uddeso uddiṭṭhaparipucchanaṃ

kālena dhammassavanaṃ ṭhānāṭṭhānavinicchayo

pañca dhamme upanissāya moho pahīyatī"ti.

Ime pañca dhammā upanissitabbā. Garuṃ upanissāya viharanto hi bhikkhu "ācariyo gāmappavesanaṃ anāpucchantassa vattakāle vattaṃ akarontassa ghaṭasataudakāharaṇādidaṇḍakammaṃ karotī"ti yattappaṭiyatto hoti, athassa moho pahīyati. Uddesaṃ gaṇhantopi "āciriyo uddesakāle uddesaṃ agaṇhantassa asādhukaṃ sajjhāyantassa asajjhāyantassa ca daṇḍaṃ karotī"ti yattappaṭiyatto hoti, evaṃpissa moho pahīyati. Garubhāvanīye bhikkhū upasaṅkamitvā "idaṃ bhante kathaṃ imassa ko attho"ti paripucchantopi kaṅkhaṃ vinodeti, evaṃpissa moho pahīyati. Kālena dhammassavanaṭṭhānaṃ gantvā sakkaccaṃ dhammaṃ suṇantassāpi tesu tesu ṭhānesu attho pākaṭo hoti. Evaṃpissa moho pahīyati. Idamassa kāraṇaṃ, idaṃ akāraṇanti ṭhānāṭṭhānavinicchaye cheko hoti, evaṃpissa moho pahīyati, tenassa pañca dhamme upanissayo aññaṃ nimittaṃ nāma hoti.