Tattha tassa purisassa sīghagamanakālo viya imassa bhikkhuno vitakkasamāruḷhakālo, tattha sanikagamanakālo viya imassa vitakkacāraparicchedakālo, tassa vitakkakālo viya imassa vitakkacāre pacchinne mūlakammaṭṭhānaṃ vitakkāharaṇakālo, tassa nisinnakālo viya imassa vipassanaṃ vaḍḍhetvā arahattappattakālo, tassa nipannakālo viya imassa nibbānārammaṇāya phalasamāpattiyā divasaṃ vītivattanakālo. Tattha ime vitakkā kiṃhetukā kiṃpaccayāti vitakkānaṃ mūlamūlaṃ gacchantassa vitakkacāro sithilo hoti. Tasmiṃ sithilībhūte matthakaṃ gacchante vitakkā sabbaso nirujjhanti. Ayamattho duddubhajātakena dīpetabbo:-

sasakassa kira veluvarukkhamūle niddāyantassa veluvapakkaṃ vaṇṭato chijjitvā kaṇṇamūle patitaṃ. So tassa saddena "paṭhavī bhijjatī"ti saññāya uṭṭhahitvā vegena palāyi. Taṃ disvā purato aññepi catuppādā palāyiṃsu. Tadā bodhisatto sīho hoti, so cintesi "ayaṃ paṭhavī nāma kappavināse

@4 cha.Ma. saṇikaṃ, evamuparipi 5 cha.Ma. cintesi 6 cha.Ma. vitakkacārapacchedakālo