@Ma.mū. 12/351/214 vammikasutta 8 khu. mahā.29/12/7 kāmasuttaniddes(syā)

[235] Yato kho te bhikkhūti yadā te bhikkhū. Evaṃ byā kho ahaṃ bhante bhagavatāti idaṃ esa attano ajjhāsayena natthīti vattukāmopi bhagavato ānubhāvena sampaṭicchati, buddhānaṃ kira sammukhā dve kathā kathetuṃ samattho nāma natthi.

[236] Kassa kho nāma tvaṃ moghapurisāti tvaṃ moghapurisa kassa khattiyassa vā brāhmaṇassa vā vessassa vā suddassa vā gahaṭṭhassa vā pabbajitassa vā devassa vā manussassa vā mayā evaṃ dhammaṃ desitaṃ ājānāsi. Atha kho bhagavā bhikkhū āmantesīti ayaṃ pāṭiyekko anusandhi. Ariṭṭho kira cintesi "bhagavā maṃ moghapurisoti vadeti, na kho pana moghapurisoti vuttamattakena maggaphalānaṃ upanissayo na hoti. Upasenaṃpi hi vaṅgantaputtaṃ atilahuṃ kho tvaṃ moghapurisa bāhullāya āvatto'ti bhagavā moghapurisavādena ovadi, thero aparabhāge ghaṭento vāyamanto cha abhiññā sacchākāsi. Ahaṃpi tathārūpaṃ viriyaṃ paggaṇhitvā maggaphalāni nibbattessāmī"ti. Athassa bhagavā bandhanā muttassa paṇḍupalāsassa viya aviruḷhibhāvaṃ dassento imaṃ desanaṃ ārabhi.

Usmīkatopīti bhikkhave tumhe kinti maññatha, ayaṃ ariṭṭho evaṃladdhiko sabbaññutañāṇena paṭivirujjhitvā vesārajjañāṇaṃ paṭibāhetvā tathāgatassa āṇācakke pahāraṃ dadamāno api nu imasmiṃ dhammavinaye usmīkatopi. Yathā nibbutepi mahante aggikkhandhe khajjupanakamattāpi aggipapaṭikā hotiyeva, yaṃ nissāya puna mahāaggikkhandho bhaveyya, kiṃ nukho evaṃ imassa appamattikāpi ñāṇusmā atthi, yaṃ nissāya vāyamanto maggaphalāni nibbatteyyāti. No hetaṃ bhanteti bhante evaṃladdhikassa kuto evarūpā ñāṇusmāti maggaphalānaṃ paccayasamatthāya ñāṇusmāya usmīkatabhāvaṃ paṭikkhipantā vadanti. Maṅkubhūtoti nittejabhūto. Pattakkhandhoti patitakkhandho. Appaṭibhāṇoti kiñci paṭibhāṇaṃ apassanto chinnapaṭibhāṇo evarūpampi nāma niyyānikasāsanaṃ labhitvā aviruḷhidhammo kiramhi samugghātitapaccayo jātoti attano abhabbataṃ paccavekkhanto pādaṅguṭṭhakena bhūmiṃ khaṇamāno nisīdi.