Paññāyissasi khoti ayampi pāṭiyekko anusandhi. Ariṭṭho kira cintesi "bhagavā mayhaṃ maggaphalānaṃ upanissayo pacchinnoti vadati, na kho pana buddhā saupanissayānaṃyeva dhammaṃ desenti, anupanissayānaṃpi desenti, ahaṃ satthu santikā sugatovādaṃ labhitvā attano sampattūpagaṃ kusalaṃ karissāmī"ti. Atha bhagavā ovādaṃ paṭipassambhento "paññāyissasī"tiādimāha. Tassattho, tvaṃyeva kho moghapurisa iminā pāpakena diṭṭhigatena nirayādīsu paññāyissasi, mama santikā tuyhaṃ sugatovādo nāma natthi, na me tayā attho, idhāhaṃ bhikkhū paṭipucchissāmīti.

[237] Athakho bhagavāti ayampi pāṭiyekko anusandhi. Imasmiṃ hi ṭhāne bhagavā parisaṃ sodheti, ariṭṭhaṃ gaṇato nissāreti. Sace hi parisagatānaṃ kassaci evaṃ bhaveyya "ayaṃ ariṭṭho bhagavatā akathitaṃ kathetuṃ kiṃ sakkhissati, kacci nukho parisamajjhe bhagavatā kathāya samāraddhāya sahasā kathitan"ti. Evaṃ kathitaṃ pana na ariṭṭhoyeva suṇāti, aññenapi sutaṃ bhavissati. Athāpissa siyā "yathā satthā ariṭṭhaṃ niggaṇhati, maṃpi evaṃ niggaṇheyyāti sutvāpi tuṇhībhāvaṃ āpajjeyyā"ti. "taṃ sabbaṃ na karissantī"ti mayāpi na kathitaṃ, aññena sutaṃpi natthīti "tumhepi me bhikkhave"tiādinā parisāya laddhiṃ sodheti. Parisāya pana laddhisodhaneneva ariṭṭho gaṇato nissārito nāma hoti.

Idāni ariṭṭhassa laddhiṃ pakāsento so vata bhikkhavetiādimāha. Tattha aññatreva kāmehītiādīsu yo so bhikkhave bhikkhu "te paṭisevato nālaṃ antarāyāyā"ti evaṃladdhiko, so vata kilesakāmehi ceva kilesakāmasampayuttehi saññāvitakkehi ca aññatra, ete dhamme pahāya, vinā etehi dhammehi, vatthukāme paṭisevissati, methunasamācāraṃ samācarissatīti netaṃ ṭhānaṃ vijjati, idaṃ kāraṇaṃ nāma natthi, aṭṭhānametaṃ anavakāsoti.