rajo ca dhūmo ca mayā pakāsitā

hitvā tuvaṃ pabbaja brahmadattā"ti

ettha pañcakāmaguṇesu. "dhūmaṃ kattā hotī"ti ettha dhammadesanāya. "dhajo rathassa paññāṇaṃ, dhūmo paññāṇamaggino"ti ettha pakatidhūme. Idha panāyaṃ vitakke adhippeto. Tenāha "ayaṃ rattiṃ dhūmāyanā"ti.

Tathāgatassetaṃ adhivacananti tathāgato hi sattannaṃ dhammānaṃ bāhitattā brāhmaṇo nāma. Yathāha "sattannaṃ kho bhikkhu dhammānaṃ bāhitattā brāhmaṇo hoti. Katamesaṃ sattannaṃ, rāgo bāhito hoti, doso, moho, māno, sakkāyadiṭṭhi, vicikicchā, sīlabbataparāmāso bāhito hoti. Imesaṃ bhikkhu sattannaṃ dhammānaṃ bāhitattā brāhmaṇo"ti. Sumedhoti sundarapañño. Sekkhassāti ettha sikkhatīti sekkho. Yathāha "sikkhatīti kho bhikkhu tasmā sekkhoti vuccati. Kiñca sikkhati, adhisīlaṃpi sikkhati, adhicittaṃpi sikkhati, adhipaññaṃpi sikkhatī"ti.