Evaṃ durāsadaṃ satthāraṃ te bhikkhū sayaṃ yācituṃ asakkontā āyasmantaṃ ānandaṃ yācamānā "sādhu mayaṃ āvuso"ti āhaṃsu.

Appeva nāmāti api nāma labheyyātha. Kasmā pana thero te bhikkhū "rammakassa brāhmaṇassa assamaṃ upasaṅkameyyāthā"ti āha? pākaṭakiriyatāya. Dasabalassa hi kiriyā therassa pākaṭā hoti, jānāti thero "ajja satthā jetavane vasitvā pubbārāme divāvihāraṃ karissati, ajja pubbārāme vasitvā jetavane divāvihāraṃ karissati, ajja ekakova piṇḍāya pavisissati, ajja bhikkhusaṃghaparivuto imasmiṃ kāle janapadacārikaṃ nikkhamissatī"ti. Kiṃ panassa evaṃ jānanatthaṃ cetopariyañāṇaṃ atthīti. Natthi. Anumānabuddhiyā pana katakiriyāya nayaggāhena jānāti. Yadā hi divasaṃ bhagavā jetavane vasitvā pubbārāme divāvihāraṃ kātukāmo hoti, tadā senāsanaparikkhārabhaṇḍānaṃ paṭisāmanākāraṃ dasseti, thero sammajjanisaṅkārachaḍḍanakādīni paṭisāmeti. Pubbārāme vasitvā jetavanaṃ divāvihārāya āgamanakālepi eseva nayo.

Yadā pana ekako piṇḍāya caritukāmo hoti, tadā pātova sarīrapaṭijagganaṃ katvā gandhakuṭiṃ pavisitvā dvāraṃ pidhāya phalasamāpattiṃ appetvā nisīdati. Thero "ajja bhagavā bodhaneyyabandhavaṃ disvā nisinno"ti tāya saññāya ñatvā "ajja āvuso bhagavā ekako pavisitukāmo, tumhe bhikkhācārasajjā hothā"ti bhikkhūnaṃ saññaṃ deti. Yadā pana bhikkhusaṃghaparivāro pavisitukāmo hoti, tadā gandhakuṭidvāraṃ upaḍḍhapidahitaṃ katvā phalasamāpattiṃ appetvā nisīdati, thero tāya saññāya ñatvā pattacīvaragahaṇatthāya bhikkhūnaṃ saññaṃ deti. Yadā janapadacārikaṃ caritukāmo hoti, tadā ekaṃ dve ālope atirekaṃ bhuñjati, sabbakālaṃ caṅkamanañcāruyha aparāparaṃ caṅkamati, thero tāya saññāya ñatvā "bhagavā āvuso janapadacārikaṃ caritukāmo hoti, tumhākaṃ kattabbaṃ karothā"ti bhikkhūnaṃ saññaṃ deti.