Lābhā no āvusoti anussuyyako kiresa kālāmo. Tasmā "ayaṃ adhunāgato, kinti katvā imaṃ dhammaṃ nibbattesī"ti ussūyaṃ akatvā pasanno pasādaṃ pavedento

Ubhova santā imaṃ gaṇaṃ pariharāmāti "mahā ayaṃ gaṇo, dvepi janā pariharāmā"ti vatvā gaṇassa saññaṃ adāsi, "ahaṃpi sattannaṃ samāpattīnaṃ lābhī, mahāpurisopi sattannameva, ettakā janā mahāpurisassa santike parikammaṃ uggaṇhatha, ettakā mayhan"ti majjhe bhinditvā adāsi. Uḷārāyāti uttamāya. Pūjāyāti kālāmassa kira upaṭṭhākā itthiyopi purisāpi gandhamālādīni gahetvā āgacchanti. Kālāmo "gacchatha, mahāpurisaṃ pūjethā"ti vadati. Te taṃ pūjetvā yaṃ avasiṭṭhaṃ hoti, tena kālāmaṃ pūjenti. Mahagghāni mañcapīṭhāni āharanti, tānipi mahāpurisassa dāpetvā yadi avasiṭṭhaṃ hoti, attanā gaṇhāti. Gatagataṭṭhāne varasenāsanaṃ bodhisattassa jaggāpetvā sesakaṃ attanā gaṇhāti. Evaṃ uḷārāya pūjāya pūjesi. Nāyaṃ dhammo nibbidāyātiādīsu ayaṃ sattasamāpattidhammo neva vaṭṭe nibbindanatthāya na virajjanatthāya na rāgādīnaṃ nirodhanatthāya na upasamatthāya na abhiñañeyyadhammaabhijānanatthāya na catumaggasambodhāya na nibbānasacchikiriyāya saṃvattatīti attho.

Yāvadeva ākiñcaññāyatanūpapattiyāti yāva saṭṭhikappasahassāyuparimāṇe ākiñcaññāyatanabhave upapatti, tāva saṃvattati, na tato uddhaṃ. Evamayaṃ punarāvattanakadhammoyeva, yañcaṭṭhānaṃ pāpeti, taṃ jātijarāmaraṇehi aparimuttameva maccupāsaparikkhittamevāti. Tato paṭṭhāya ca pana mahāsatto yathā nāma chātajjhattapuriso manuññabhojanaṃ labhitvā sampiyāyamānopi bhuñjitvā pittavasena vā semhavasena vā mucchikāvasena vā chaḍḍetvā puna ekaṃ piṇḍaṃ bhuñjissāmīti manaṃ na uppādeti, evameva imā sattasamāpattiyo mahantena ussāhena nibbattetvāpi tāsu imaṃ punarāvattikādibhedaṃ ādīnavaṃ disvā puna imaṃ dhammaṃ āvajjissāmi vā samāpajjissāmi vā adhiṭṭhahissāmi vā vuṭṭhahissāmi vā paccavekkhissāmi vāti cittameva na uppādesi. Analaṅkaritvāti alaṃ iminā alaṃ imināti punappunaṃ analaṅkaritvā. Nibbijjāti nibbinditvā. Apakkaminti agamāsiṃ.