Ajitoti tassa nāmaṃ. Kesakambalaṃ dhāretīti kesakambalo. Iti nāmadvayaṃ saṃsandetvā "ajito kesakambalo"ti vuccati. Tattha kesakambalo nāma manussakesehi katakambalo, tato paṭikiṭṭhataraṃ vatthaṃ nāma natthi. Yathāha "seyyathāpi bhikkhave yāni kānici tantāvutānaṃ vatthānaṃ kesakambalo tesaṃ paṭikiṭṭho akkhāyati, kesakambalo bhikkhave sīte sīto uṇhe uṇho dubbaṇṇo duggandho dukkhasamphasso"ti.

`pakudho'ti Tassa nāmaṃ. Kaccāyanoti gottaṃ. Iti nāmagottaṃ saṃsandetvā "pakudho kaccāyano"ti vuccati. Sītūdakapaṭikkhittako esa, vaccaṃ katvāpi udakakiccaṃ na karoti, uṇhodakaṃ vā kañjiyaṃ vā labhitvā karoti, nadiṃ vā maggodakaṃ vā atikkamma "sīlaṃ me bhinnan"ti vālikaṃ thūpikaṃ katvā sīlaṃ adhiṭṭhāya gacchati, evarūpo nissirikaladdhiko esa.

Sañjayoti tassa nāmaṃ. Velaṭṭhassa puttoti velaṭṭhaputto. Amhākaṃ ganthanakileso palibandhanakileso natthi, kilesagantharahitā mayanti evaṃ vāditāya laddhanāmavasena nigantho. Nāṭassa puttoti nāṭaputto. Abbhaññiṃsūti yathā tesaṃ paṭiññā, tatheva jāniṃsu. Na jāniṃsūti. Idaṃ vuttaṃ hoti:- sace nesaṃ sā paṭiññā niyyānikā sabbe abbhaññiṃsu. No ce, niyyānikā na abbhaññiṃsu. Tasmā kintesaṃ paṭiññā niyyānikā aniyyānikāti, ayametassa pañhassa attho. Atha bhagavā nesaṃ aniyyānikabhāvakathanena atthābhāvato alanti paṭikkhipitvā upamāya atthapadaṃ vedento dhammameva desetuṃ dhammante brāhmaṇa desessāmītiādimāha.

[320] Tattha sacchikiriyāyāti sacchikaraṇatthaṃ. Na chandaṃ janetīti kattukamyatāchandaṃ na janeti. Na vāyamatīti vāyāmaṃ parakkamaṃ na karoti. Olīnavuttiko ca hotīti līnajjhāsayo hoti. Sāthilikoti sithilaggāhī, sāsanaṃ sithilaṃ katvā gaṇhāti, daḷhaṃ na gaṇhāti.