[7] Evaṃ bhagavā paṭhavīādīsu vatthūsu sabbasakkāyadhammamūlabhūtaṃ puthujjanassa pavattiṃ dassetvā idāni tesveva vatthūsu sekhassa pavattiṃ dassento yopi so bhikkhave bhikkhu sekhoti ādimāha. Tattha yoti uddesavacanaṃ. Soti niddesavacanaṃ. Pikāro sampiṇḍanattho ayampi dhammo aniyatoti ādīsu viya. Tena ca ārammaṇasabhāgena puggalaṃ sampiṇḍeti no puggalasabhāgena, heṭṭhato hi puggalā diṭṭhivipannā, idha diṭṭhisampannā, na tesaṃ sabhāgatā atthi. Ārammaṇaṃ pana heṭṭhā puggalānaṃpi tatheva, imesaṃpi tadevāti. Tena vuttaṃ "ārammaṇasabhāgena puggalaṃ sampiṇḍeti no puggalasabhāgenā"ti. Yopi soti iminā pana sakalena vacanena idāni vattabbaṃ sekhaṃ dassetīti veditabbo. Bhikkhave bhikkhūti idaṃ vuttanayameva.

Sekhoti kenaṭṭhena sekho? sekhadhammapaṭilābhato sekho. Vuttañhetaṃ "kittāvatā nu kho bhante sekho *- hotīti, idha bhikkhave bhikakhu sekhāya sammādiṭṭhiyā samannāgato hoti .pe. Sekhena sammāsamādhinā samannāgato hoti, ettāvatā kho bhikkhu sekho hotī"ti. Apica sikkhatītipi sekho. Vuttañhetaṃ "sikkhatīti kho bhikkhu tasmā sekhoti vuccati, kiñca sikkhati? adhisīlaṃpi sikkhati, adhicittaṃpi sikkhati, adhipaññaṃpi sikkhati, sikkhatīti kho bhikkhu tasmā sekhoti vuccatī"ti

yopi kalyāṇaputhujjano anulomapaṭipadāya paripūrikārī sīlasampanno indriyesu guttadvāro bhojane mattaññū jāgariyānuyogamanuyutto pubbarattāpararattaṃ bodhipakkhiyānaṃ dhammānaṃ bhāvanānuyogamanuyutto viharati "ajja vā sve vā aññataraṃ sāmaññaphalaṃ adhigamissāmī"ti. Sopi vuccati sikkhatīti sekho. Imasmiṃ panatthe paṭivedhappattova sekho adhippeto, no puthujjano.