[335] Sahassaṃ lokānanti sahassaṃ lokadhātūnaṃ. Ettakaṃ hi therassa dhuvasevanaṃ āvajjanapaṭibaddhaṃ, ākaṅkhamāno pana thero anekānipi cakkavāḷasatasasahassāni voloketiyeva. Uparipāsādavaragatoti sattabhūmikassa vā navabhūmikassa vā pāsādavarassa upari gato. Sahassaṃ nemimaṇḍalānaṃ volokeyyāti pāsādapariveṇe nābhiyā patiṭṭhitānaṃ nemivaṭṭiyā nemivaṭṭiṃ āhacca ṭhitānaṃ nemimaṇḍalānaṃ sahassaṃ vātapānaṃ vivaritvā olokeyya, tassa nābhiyopi pākaṭā honti, arāpi arantarānipi nemiyopi. Evameva kho āvusoti āvuso evaṃ ayaṃpi dibbacakkhuko bhikkhu dibbena cakkhunā atikkantamānusakena sahassaṃ lokānaṃ voloketi. Tassa pāsāde ṭhitapurisassa cakkanābhiyo viya cakkavāḷasahasse sinerusahassaṃ pākaṭaṃ hoti. Arā viya dīpā pākaṭā honti. Arantarāni viya dīpaṭṭhitamanussā pākaṭā honti. Nemiyo viya cakkavāḷapabbatā pākaṭā honti.

[336] Āraññikoti samādinnaaraññadhutaṅgo. Sesapadesupi eseva nayo.

[337] No ca saṃsādentīti na osādenti. Sahetukañhi sakāraṇaṃ katvā pañhaṃ pucchituṃ vissajjitumpi asakkonto saṃsādeti nāma, evaṃ na karontīti attho. Pavattinī hotīti nadīsotaudakaṃ viya pavattati.

[338] Yāya vihārasamāpattiyāti yāya lokiyāya vā lokuttarāya vā vihārasamāpatiyā.