[379] Mā kho tvaṃ mārisāti sampiyāyamānā āhaṃsu. Devatānaṃ kirāyaṃ piyamanāpavohāro, yadidaṃ mārisāti. Ajajjitanti abhojanaṃ. Halanti vadāmīti alanti vadāmi, alaṃ iminā mā evaṃ karittha, yāpessāmahanti evaṃ paṭisedhemīti attho.

[380-1] Maṅguracchavīti maṅguramacchacchavi. Etāva paramanti tāsaṃpi vedanānaṃ etaṃyeva paramaṃ uttamaṃ pamāṇaṃ. Pitu sakkassa kammante .pe. Paṭhamaṃ jhānaṃ upasampajja viharitāti rañño kira vappamaṅgaladivaso nāma hoti, tadā anekappakāraṃ khādanīyaṃ bhojanīyaṃ paṭiyādenti, nagaravīthiyo sodhāpetvā puṇṇaghaṭe ṭhapāpetvā dhajapaṭākādayo ussāpetvā sakalanagaraṃ devavimānaṃ viya alaṅkaronti, sabbe dāsakammakarādayo āhatavatthanivatthā gandhamālādipaṭimaṇḍitā rājakule sannipatanti.

@so upari pāṭho ajajjitanti evaṃ abhajjitaṃ bhakārassa jakārādesaṃ katvāti