Tadubhayasamaṅgīpuggalo imāya paṭinissaggānupassanāya samannāgatattā paṭinissaggānupassī nāma hoti, taṃ sandhāya vuttaṃ "paṭinissaggānupassī"ti. Na kiñci loke upādiyatīti kiñci ekaṃpi saṅkhāragataṃ taṇhāvasena na upādiyati na gaṇhāti na parāmasati. Anupādiyaṃ na paritassatīti aggaṇhanto taṇhāhi paritassanāya na paritassati. Paccattaññeva parinibbāyatīti sayameva kilesaparinibbānena parinibbāyati. Khīṇā jātītiādinā panassa paccavekkhaṇāva dassitā. Iti bhagavā sakkassa devānamindassa saṅkhittena khīṇāsavassa pubbabhāgapaṭipadaṃ pucchito sallahukaṃ katvā saṅkhitteneva khippaṃ katheti.

[391] Avidūre nisinno hotīti anantare kūṭāgāre nisinno hoti. Abhisameccāti ñāṇena abhisamāgantvā, jānitvāti attho. Idaṃ vuttaṃ hoti:- kiṃ nu kho esa jānitvā anumodi, udāhu ajānitvā vāti. Kasmā panassa evamahosi? thero kira na bhagavato pañhāvissajjanasaddaṃ assosi, sakkassa pana devarañño "evametaṃ bhagavā evametaṃ sugatā"ti anumodanasaddamassosi. Sakko kira devarājā mahatā saddena anumodi. Atha kasmā na bhagavato saddaṃ assosīti? yathāparisaviññāpakattā. Buddhānaṃ hi dhammaṃ kathentānaṃ ekābandhāya cakkavāḷapariyantāyapi parisāya saddo suyyati, parisantaṃ pana muñcitvā aṅgulimattaṃpi bahiddhā na niccharati. Kasmā? evarūpā madhurakathā mā niratthakā agamāsīti. Tadā bhagavā migāramātu pāsāde sattaratanamaye kūṭāgāre sirigabbhamhi nisinno hoti, tassa dakkhiṇapasse sāriputtattherassa vasanakūṭāgāraṃ, vāmapasse mahāmoggallānassa, antare chiddavivarokāso natthi, tasmā thero na bhagavato saddaṃ assosi, sakkasseva assosīti.

Pañcahi turiyasatehīti pañcaṅgikānaṃ turiyānaṃ pañcahi satehi. Pañcaṅgikaturiyannāma ātataṃ vitataṃ ātatavitataṃ susiraṃ ghananti imehi pañcahaṅgehi samannāgataṃ. Tattha ātatannāma cammapariyonaddhesu bherīādīsu ekatalaturiyaṃ,