@4 cha.Ma. vedikapādā 5 cha.Ma. ayaṃ pāṭho na dissati

[393] Vessavaṇo ca mahārājāti so kira sakkassa vallabho balavavissāsiko, tasmā sakkena saddhiṃ agamāsi. Purakkhatvāti purato katvā. Pavisiṃsūti pavisitvā pana upaḍḍhapihitāni dvārāni katvā olokayamānā aṭṭhaṃsu. Idampi mārisa moggallāna passa vejayantapāsādassa rāmaṇeyyakanti mārisa moggallāna idampi vejayantassa rāmaṇeyyakaṃ passa, suvaṇṇatthambhe passa, rajatatthambhe maṇitthambhe pabāḷatthambhe lohitaṅgatthambhe masāragallatthambhe muttatthambhe sattaratanatthambhe, tesaṃyeva suvaṇṇādimayaghaṭake vālarūpakāni ca passāti evaṃ thambhapantiyo ādiṃ katvā rāmaṇeyyakaṃ dassento evamāha. Yathā taṃ pubbe katapuññassāti yathā pubbe katapuññassa upabhogaṭṭhānena sobhitabbaṃ, evameva sobhatīti attho. Atibāḷhaṃ kho ayaṃ yakkho pamatto viharatīti attano pāsāde nāṭakaparivārena sampattiyāva vasena ativiya matto.

Iddhābhisaṅkhāraṃ abhisaṅkhāsīti iddhiṃ akāsi. Āpokasiṇaṃ samāpajjitvā pāsāde patiṭṭhitokāsaṃ udakaṃ hotūti iddhiṃ adhiṭṭhāya pāsādakaṇṇike pādaṅguṭṭhakena pahari, so pāsādo yathā nāma udakapiṭṭhe ṭhapitaṃ pattaṃ mukhavaṭṭiyaṃ aṅguliyā pahaṭaṃ aparāparaṃ kampati calati na santiṭṭhati, evameva saṅkampi sampakampi sampavedhi, thambhapiṭṭhisaṅghāṭakaṇṇikagopānasiādīni karakarātisaddaṃ muñcantāni patituṃ viya āraddhāni. Tena vuttaṃ "saṅkampesi sampakampesi sampavedhesī"ti. Acchariyabbhūtacittajātāti aho acchariyaṃ aho abbhūtanti evaṃ sañjātaacchariyabbhūtā ceva sañjātatuṭṭhino ca ahesuṃ uppannabalavasomanassā. Saṃvigganti ubbiggaṃ calitaṃ. Lomahaṭṭhajātanti jātalomahaṃsaṃ, kañcanabhittiyaṃ ṭhapitamaṇināgadantehi viya uddhaggehi lomehi ākiṇṇasarīranti attho. Lomahaṃso ca nāmesa somanassenapi hoti domanassenapi, idha pana somanassena jāto. Thero hi sakkassa somanassavegena saṃvejetuṃ taṃ pāṭihāriyamakāsi. Tasmā somanassavegena saṃviggalomahaṭṭhaṃ viditvāti attho.