Tathā na sakkā yāya vā tāya vā appamattikāya paññāya samannāgatena bhikkhunā dhammakathaṃ kathentena dasa kathāvatthūni ārabhitvā satta visuddhiyo vibhajantena dhammakathaṃ kathetuṃ, mahāpaññena pana sakkāti mahāpaññatāya puṇṇatthero catuparisamajjhe alaṅkatadhammāsane cittavījaniṃ gahetvā nisinno līlāyanto puṇṇacando viya dhammakathaṃ katheti. Teneva naṃ bhagavā egadagge ṭhapesi "etadaggaṃ bhikkhave mama sāvakānaṃ bhikkhūnaṃ dhammakathikānaṃ yadidaṃ puṇṇo mantāṇiputto"ti.

Tathā yāya vā tāya vā appamattikāya paññāya samannāgato bhikkhu dhammakathaṃ kathento ito vā etto vā anukkamitvā yaṭṭhikoṭiṃ gahetvā andho viya ekapadikaṃ daṇḍakasetuṃ āruḷho viya ca gacchati, mahāpañño pana catuppādikaṃpi gāthaṃ nikkhipitvā upamā ca kāraṇāni ca osāretvā tepiṭakaṃ buddhavacanaṃ gahetvā heṭṭhuppariyaṃ karonto katheti, mahāpaññatāya pana kumārakassapatthero catuppadikagāthaṃpi nikkhipitvā upamā ca kāraṇāni ca āharitvā tehi saddhiṃ yojento jātassare pañcavaṇṇāni kusumāni phullāpento viya sinerumatthake vaṭṭisahassaṃ telappadīpaṃ jālento viya tepiṭakaṃ buddhavacanaṃ

@3 cha.Ma. āharitvā 4 cha.Ma. dhammaṃ kathesi 5 aṅ. ekaka. 20/196/23 etadaggavagga