จารุํ คจฺฉต โลกคฺโค หาสยนฺโต สเทวเก.

อุสภราชาว ๑- โสภนฺโต จตุจารีว เกสรี

โตสยนฺโต พห สตฺเต ปุรํ เสฏฺฐํ อุปาคมี"ติ.

วณฺณกาโล นาม กิเรส, เอวํวิเธสุ กาเลสุ พุทฺธสฺส สรีรวณฺเณ วา คุณวณฺเณ วา ธมฺมกถิกสฺส ถาโมเยว ปมาณํ. จุณฺณปเทหิ วา คาถาพนฺเธน วา ยตฺตกํ สกฺโกติ, ตตฺตกํ วตฺตพฺพํ. ทุกฺกถิตนฺติ น วตฺตพฺพํ. อปฺปมาณวณฺณา หิ พุทฺธา, เตสํ พุทฺธาปิ อนวเสสโต วณฺณํ วตฺตุํ อสมตฺถา, ปเคว อิตรา ปชาติ. อิมินา สิริวิลาเสน อลงฺกตปฺปฏิยตฺตํ สกฺยราชปุรํ ปวิสิตฺวา ภควา ปสนฺนจิตฺเตน ชเนน คนฺธธูปวาสจุณฺณาทีหิ ปูชิยมาโน ๒- สนฺถาคารํ ปาวิสิ. เตน วุตฺตํ "อถโข ภควา นิวาเสตฺวา ปตฺตจีวรํ อาทาย สทฺธึ ภิกฺขุสํเฆน เยน นวํ สนฺถาคารํ เตนุปสงฺกมี"ติ.