[๒๘๓] มุณฺฑเกน สมณเกนาติ มุณฺฑํ มุณฺโฑติ, สมณํ วา สมโณติ วตฺตุํ วฏฺฏติ, อยํ ปน อปริปกฺกญาณตฺตา พฺราหฺมณกุเล อุคฺคหิตโวหารวเสเนว หีเฬนฺโต เอวมาห. โสตฺติสินานนฺติ ๒- สินานตฺถาย กตโสตฺตึ. โสตฺติ นาม กุรุวินฺทปาสาณจุณฺณานิ ลาขาย พนฺธิตฺวา กตคุลิกกลาปโก วุจฺจติ, ยํ สนฺธาย "เตน โข ปน สมเยน ฉพฺพคฺคิยา ภิกฺขู กุรุวินฺทกสุตฺติยา นหายนฺตี"ติ ๓- วุตฺตํ. ตํ อุโภสุ อนฺเตสุ คเหตฺวา สรีรํ ฆํสนฺติ. เอวํ สมฺมาติ ยถา เอตรหิปิ มนุสฺสา "เจติยวนฺทนาย คจฺฉาม, ธมฺมสฺสวนาย คจฺฉามา"ติ วุตฺตา อุสฺสาหํ น กโรนฺติ, "นฏสมชฺชาทิทสฺสนตฺถาย คจฺฉามา"ติ วุตฺตา ปน เอกวจเนเนว สมฺปฏิจฺฉนฺติ, ตเถว สินฺหายิตุนฺติ วุตฺเต เอกวจเนน สมฺปฏิจฺฉนฺโต เอวมาห.
[๒๘๔] โชติปาลํ มาณวํ อามนฺเตสีติ เอกปสฺเส อริยปริหาเรน ปฐมตรํ นหายิตฺวา ปจฺจุตฺตริตฺวา ฐิโต ตสฺส มหนฺเตน อิสฺสริยปริหาเรน นหายนฺตสฺส นหานปริโยสานํ อาคเมตฺวา ตํ นิวตฺถนิวาสนํ เกเส นิโรทเก ๔- กุรุมานํ อามนฺเตสิ. อยนฺติ อาสนฺนตฺตา ทสฺเสนฺโต อาห. โอวฏฺฏิกํ วินิเวเฐตฺวาติ ๕- นาคพโล โพธิสตฺโต "อเปหิ สมฺมา"ติ อีสกํ ปริวตฺตมาโนว เตน คหิตคหณํ วิสฺสชฺชาเปตฺวาติ อตฺโถ. เกเสสุ ปรามสิตฺวา เอตทโวจาติ โส กิร จินฺเตสิ "อยํ โชติปาโล ปญฺญวา, สกึ ทสฺสนํ ลภมาโน ตถาคตสฺส ทสฺสเนปิ ปสีทิสฺสติ,
@๔ ฉ.ม. โวทเก ๕ ฉ.ม. วินิวฏฺเฏตฺวาติ ธมฺมกถายปิ ปสีทิสฺสติ, ปสนฺโน จ ปสนฺนาการํ กาตุํ สกฺกิสฺสติ, มิตฺตา นาม เอตทตฺถํ โหนฺติ, ยงฺกิญฺจิ กตฺวา มม สหายํ คเหตฺวา ทสพลสฺส สนฺติกํ คมิสฺสามี"ติ. ตสฺมา นํ เกเสสุ ปรามสิตฺวา เอตทโวจ.