สุชาตา นาม ชนิกา ปทุมุตฺตรสฺส สตฺถุโน"ติ. ๔-

ปทุมุตฺตเร ปน อนุปฺปนฺเนเอว หํสวติยา เทฺว กุฏุมฺพิกา สทฺธา ปสนฺนา ๕- กปณทฺธิกยาจกาทีนํ ทานํ ปฏฺฐปยึสุ. ตทา ปพฺพตวาสิโน ปญฺจสตา ตาปสา หํสวตึ อนุปฺปตฺตา. เต เทฺวปิ ชนา ตาปเส คณมชฺเฌ ๖- ภินฺทิตฺวา อุปฏฺฐหึสุ. ตาปสา กิญฺจิ กาลํ วสิตฺวา ปพฺพตปาทเมว คตา. เทฺว สํฆตฺเถรา โอหิยึสุ. ตทา เตสํ เต ยาวชีวํ อุปฏฺฐานํ อกํสุ. ตาปเสสุ ภุญฺชิตฺวา อนุโมทนํ กโรนฺเตสุ เอโก สกฺกสฺส ภวนสฺส วณฺณํ กเถสิ, เอโก ภูมินฺธรนาคราชภวนสฺส.

กุฏุมฺพิเกสุ เอโก สกฺกภวนํ ปตฺถนํ กตฺวา สกฺโก หุตฺวา นิพฺพตฺโต, เอโก นาคภวเน ปาลิตนาคราชา นาม. ตํ สกฺโก อตฺตโน อุปฏฺฐานํ อาคตํ ทิสฺวา นาคโยนิยํ อภิรมสีติ ปุจฺฉิ. โส นาภิรมามีติ อาห. เตนหิ ปทุมุตฺตรสฺส ภควโต ทานํ ทตฺวา อิมสฺมึ ฐาเน ปตฺถนํ กโรหิ, อุโภ สุขํ วสิสฺสามาติ.