[๒๙๗-๒๙๘] อถสฺส มาตาปิตโร ติกฺขตฺตุํ วตฺวา ปฏิวจนํปิ อลภมานา สหายเก ปกฺโกสาเปตฺวา "เอส โว สหายโก ปพฺพชิตุกาโม, นิวาเรถ นนฺ"ติ อาหํสุ. เตปิ ตํ อุปสงฺกมิตฺวา ติกฺขตฺตุํ อโวจุํ, เตสํปิ ตุณฺหี อโหสิ. เตน วุตฺตํ อถโข รฏฺฐปาลสฺส กุลปุตฺตสฺส สหายกา ฯเปฯ ตุณฺหี อโหสีติ. อถสฺส สหายกานํ ติกฺขตฺตุํ วตฺวา เอตทโหสิ "สเจ อยํ ปพฺพชฺชํ อลภมาโน มริสฺสติ, น โกจิ คุโณ ลพฺภติ. ปพฺพชิตํ ปน นํ มาตาปิตาโรปิ กาเลน กาลํ ปสฺสิสฺสนฺติ, มยํปิ ปสฺสิสฺสาม, ปพฺพชฺชาปิ จ นาเมสา ภาริยา, ทิวเส ทิวเส มตฺติกาปตฺตํ คเหตฺวา ปิณฺฑาย จริตพฺพํ, เอกเสยฺยํ เอกภตฺตํ พฺรหฺมจริยํ อติทุกฺกรํ, อยํ จ สุขุมาโล นาคริกชาติโย, ๑- โส ตํ จริตุํ อสกฺโกนฺโต ปุน อิเธว อาคมิสฺสติ, หนฺทสฺส มาตาปิตโร อนุชานาเปสฺสามา"ติ. เต ตถา อกํสุ. มาตาปิตโรปิ นํ "ปพฺพชิเตน ปน เต มาตาปิตโร อุทฺทสฺเสตพฺพา"ติ อิมํ กติกํ กตฺวา อนุชานึสุ. เตน วุตฺตํ "อถโข รฏฺฐปาลสฺส กุลปุตฺตสฺส สหายกา เยน รฏฺฐปาลสฺส กุลปุตฺตสฺส มาตาปิตโร ฯเปฯ อนุญฺญาโตสิ มาตาปิตูหิ ฯเปฯ อุทฺทสฺเสตพฺพา"ติ. ตตฺถ อุทฺทสฺเสตพฺพาติ อุทฺธํ ทสฺเสตพฺพา, ยถา ตํ กาเลน กาลํ ปสฺสนฺติ, เอวํ อาคนฺตฺวา อตฺตานํ ทสฺเสตพฺพา.

[๒๙๙] พลํ คเหตฺวาติ สปฺปายโภชนานิ ภุญฺชนฺโต อุจฺฉาทนาทีหิ จ กายํ ปริหรนฺโต กายพลํ ชเนตฺวา มาตาปิตโร วนฺทิตฺวา อสฺสุมุขํ ญาติปริวฏฺฏํ ปหาย เยน ภควา เตนุปสงฺกมิ ฯเปฯ ปพฺพาเชตุ มํ ภนฺเต ภควาติ. ภควา สมีเป

ปหิตตฺโต วิหรนฺโตติ ทฺวาทส สํวจฺฉรานิ เอวํ วิหรนฺโต. เนยฺยปุคฺคโล หิ อยมายสฺมา, ตสฺมา ปุญฺญวา อภินีหารสมฺปนฺโนปิ สมาโน "อชฺช อชฺเชว อรหตฺตนฺ"ติ สมณธมฺมํ กโรนฺโตปิ ทฺวาทสเม วสฺเส อรหตฺตํ ปาปุณิ.